Minatay nga gihatod sa taga-punerarya aron ihaya sa ilang balay ang natanggong sa gawas sa gate sa usa ka subdivision sa Barangay Guadalupe, dakbayan sa Sugbo human wala pasudla sa guwardiya tungod kay di na sila magpasulod sa mga dili residente base sa ilang gipatuman nga curfew.
Milanat og upat ka oras una gitugotan nga makasulod ang haya ug mga tawo nga nagdala sa mga gamit sa haya.
Nasayran nga adunay gamayng agianan ang mga residente sa Sityo Dakit apan lisud alang sa lungon tungod kay bakilid ang maong agianan ug gikinahanglan nga ipabarog kini sa pag-alsa.
Matod pa ni Armando Sacamay, pag-umangkon sa namatay nga si Joventina Sacamay, 70, nga ang iyang iyaan namatay niadtong Nobiyembre 28 tungod sa katiguwangon.
WA PA-AGIA
Nianang pagka alas 7 sa gabii, gihatod sa taga purenarya ang minatay ngadto sa ilang balay apan sa pag-abot sa gate sa subdivision mibabag ang sikyu kay dili na sila magpa-agi sa mga non-resident.
Ang subdivision nipatuman og curfew alang sa mga di taga subdivision nga kutob lang sa alas 6:00 sa gabii ug wala nay makaagi hangtod sa alas 6:00 sa buntag sa sunod adlaw.
Ninghangyo ang mga kabanay ni Sacamay ngadto sa guwardiya nga hatagan sila og konsiderasyon ilabi na nga wa silay igong pundo alang sa pagpahaya sa ilang minatay ngadto sa funeral homes hinungdan nga ilang giuli sa ilang balay aron adto hayaon.
Apan nagmagahi ang guwardiya kay matod pa nga sila ang makasab-an sa mga opisyal sa subdivision ug hayan mataktak pa sila sa ilang trabaho.
Tungod kay pila na ka oras nga natanggong, nahukman sa mga kabanay nga sa dalan lang una himuon ang unang gabii sa pangadye. Kini atubangan sa gate.
NAGPATABANG
Ang Superbalita Cebu nikontak sa opisyal sa Barangay Guadalupe ug hepe sa Guadalupe Police Station nga si Police Major Armando Labora busa ilang giadto ang dapit.
Silang konsehal Apple Enriquez ug kapulisan sa Presinto 9 nakigsulti sa mga guwardya apan nibalibad sa pagpaagi.
Ang administrador sa subdivision nga si Ronald Sabenorio niabot sa lugar aron sulbaron ang problema.
Sa alas 11:08 sa gabii gitugtan na ni Sabenorio nga makasulod ang haya ubos sa kondisyon nga 10 ra ka tawo ang makasulod kay maoy motabang og alsa sa lungon, kandila ug butanganan nga gamiton sa haya.
Gipahibawo niya nga wa lang una niya istriktong gipatuman ang balaod sa subdivision kay daghan na ang nahasol, lakip na ang pipila ka mga nagpuyo nga wala makasulod tungod kay dili makaagi sa gate gumikan sa lungon nga giplastar sa tunga sa dalan sa atubangan sa gate.
Si Sabenorio nipasabot sa Superbalita Cebu nga ang gipatuman sa ilang gwardiya nga wala na gyuy paagion kon moabot na ang oras sa ilang curfew gisugdan 20 ka tuig na ang nakalabay.
Samtang si Enriquez niangkon nga ikaupat na kini nga hitabo, apan una kini nga higayon nga ang minatay wa dayon paagia. Ang unang tulo sa punerarya gihaya./