“Living a legacy.”
Kini maoy mensahe ni Mayor Michael Rama atol sa tigom sa mga sakop sa Task Force Gubat sa Baha (TFGB) nga gipangulohan ni former Environment Secretary Roy Cimatu.
Si Rama nidayeg sa TFGB nga gipangulohan ni Cimatu kinsa maoy chairman, gumikan sa ilang pag-serve og notice of violation ngadto sa dagkong mga mall, hotel, restaurant kansang edepisyo nilapas sa three-meter easement zone nga gitinguha sa mayor nga mabalik.
Lakip sa mga establishment nga giisyuhan mao ang Gaisano Main, Colonnade Mall, 138 Mall ug Dimsum nga nahimutang sa downtown area samtang ang White Knight Hotel ug Lighthouse restaurant sa midtown.
Si Atty. Gerry Carillo, co-chairman sa TFGB, nagkanayon nga nagsugod na og guba sa ilang estruktura nga nasulod sa three-meter easement ang Lighthouse restaurant samtang karong adlawa usab magsugod ang White Knight Hotel.
Ang kanhi konsehal sa dakbayan sa Sugbo niingon nga ang nahisgutang business establishments gihatagan og 10 ka adlaw para magsugod pagguba sa ilang estruktura.
Dugang ni Carillo nga nag-distribute na usab sila og notices kagahapon sa laing mga balay patigayon sa Lahug river ug Mahiga creek.
Ang co-chairman sa TFGB niingon nga human sa mga business establishment, mo-focus na usab sila mga estruktura nga gipuy-an sa informal settlers.