Nipagawas og reaksyon si kanhi world champion Australian Nedal Hussein human niangkon si Fil-Am referee Carlos Padilla nga gitabangan niya si Filipino boxing icon Manny Pacquiao nga modaog batok kang Hussein niadtong Oktubre 14, 2000 sa Ynares Center sa Antipolo City.
Ning maong away, na-knockdown ang Pambansang Kamao sa 4th round apan sa video nga nikatap sa social media sa niaging adlaw, gibutyag ni Padilla nga gituyo niya paglangan ang pag-ihap aron hatagan og kahigayunan si Pacquiao nga maulian.
Matod pa ni Padilla nga nakita niyang nalibat ang mga mata ni Pacquiao niadtong higayuna.
Adunay higayon nga nagisian og dako si Hussein gumikan sa pag-headbutt ni Pacquiao apan matod ni Padilla nga naigo kini sa legal nga kumo.
Sa 10th round, gipaundang sa ring doctor ang away tungod sa dakong gisi ni Hussein ug nakuha ni Pacquiao ang World Boxing Councuil (WBC) International super bantamweight title pinaagi sa technical decision.
Gipasabot ni Padilla nga sa wala pa ang away, gipahimangnuan na siya sa nagdumala ni Pacquiao nga grabe ka mahinungdanon kining awaya alang sa 8-division world champion tungod kay dakong away ang sunod nga sagubangon niini.
Wala ra’y tuig human niini, niasdang si Pacquiao sa Las Vegas, USA sa labing unang higayon ug naangkon niini ang International Boxing Federation (IBF) super bantamweight title pinaagi sa 6th round knockout nga kadaugan batok kang Lehlohonolo Ledwaba.
Sa interbyu sa www.worldboxingnews, nagkanayon si Hussein nga kon wala pa naluwas sa tikas si Pacquiao atol sa ilang away, hayan posibleng dili kini mahimong boxing superstar o kaha malangan ang pagsikat niini.
“I can’t say Pacquiao’s career would never have been the same, but it would have been derailed, that’s for sure,” matod ni Hussein. (ESL)