Ipahigayon karong Sabado, Disyembre 3, 2022, ang All-Star Games sa Cebu Schools Athletic Foundation Inc. (CESAFI) basketball event sa Cebu Coliseum.
Modayandayan sa kalihukan mao ang 12-under exhibition game tali sa Minglanilla Boys ug Don Bosco Boys nga magkombati sugod sa alas 12:30 sa udto.
Mosunod niini ang panagsangka sa All-Star teams sa high school division dayon ang Three-Point Shootout.
Ning higayuna, wala’y ipahigayon nga Slamdunk Contest tungod kay wala’y ning-qualify nga mga partisipante.
Mosunod niini ang Declaration of the Climate Emergency nga ibatbat ni Nina Estenzo sa dili pa ipahigayon ang engkuwentro sa college division All-Star squads.
Sa laing bahin, nakasakay og libreng biyahe paingon sa high school division semi-final round ang University of the Visayas (UV) Baby Green Lancers, nga ninghuman sa ilang mga tahas sa elimination round dala ang 5-4 nga rekord.
Nahitabo kini human gipangbuntog sa defending champion Sacred Heart School-Ateneo de Cebu (SHS-AdC) Magis Eagles ang Cebu Institute of Technology-University (CIT-U) Wildkittens, 60-57, niadtong Martes, Nobiyembre 29, 2022.
Ang Magis Eagles, nga nalansang nang daan sa No. 2 spot, ninghuman sa elimination round bawon ang 8-1 nga rekord samtang nanamilit ang Wildkittens bitbit ang 4-5 nga rekord.
Kon ningdaog pa ang Wildkittens ning sangkaa, hayan makatabla sila sa Baby Green Lancers sa 5-4 nga rekord ug sila unta ang makaangkon sa No. 4 nga luna sa semis ug dili ang Baby Green Lancers tungod sa winner-over-the-other nga tie-break.
Sa laing duwa, gipangbuntog sa University of Cebu (UC) Baby Webmasters ang University of Southern Philippines Foundation (USPF) Baby Panthers sa usa ka non-bearing game.
Makonsiderar nga non-bearing ang duwa tungod kay naselyo na man daan sa Baby Webmasters (7-2) ang No. 3 nga puwesto samtang tagak na sab daan ang Baby Panthers (4-5).
Ang No. 1 team mao ang City of Bogo Science and Arts Academy (CBSAA) TrailBlazers, nga ninghuman sa elimination round dala ang perpektong 9-0 nga rekord. (ESL)