IPAILAWOM pa sa confirmatory test sa Southern Philippines Medical Center (SPMC) ang positibo nga resulta sa drug test sa usa ka bus driver ug usa ka conductor.
Kini ang resulta sa gihimong drug testing sa mga bus driver ug conductor sa Davao City Overland Transport Terminal (DCOTT) niadtong Lunes, Nobyembre 28, 2022.
Ang drug testing gihimo sa Land Transportation Office (LTO) Davao sa pagpanguna ni LTO-Davao Director Neil Cañedo.
Sa inisyal nga report, nagpositibo ang duha sa paggamit og methamphetamine hydrochloride o mas nailhang shabu, apan ipaubos pa kini sa confirmatory test.
Gipangtago una ang ilang mga pangalan, diin nasayran nga kon magpositibo na sab sila sa himuong confirmatory test, hayan nga pasakaan na sila'g kaso nga Republic Act 10586 o Anti-Drunk and Drugged Driving Act.
Sa maong hitabo, gipahibalo sa ahensiya ang kompaniya diin asa nagtrabaho ang driver ug conductor aron mahimo ang ilang aksiyon batok sa mga nahisgutan.
Ang gihimong drug testing sa mga public utility vehicle drivers may kalabutan sa pagpatuman sa LTO-Davao sa Oplan Harabas diin tumong niini nga maseguro ang seguridad ug luwas ang mga pasahero batok sa mga reckless drivers.