MISMONG si Tagum City Mayor Rey T. Uy ang mitunol sa pasidungog sa usa ka traysikel drayber nga Tagumenyo kinsa miuli sa bag nga iyang nakit-an nga dunay sulod nga P150,000 nga salapi niadtong Biyernes sa hapon, Nobiyembre 25, 2022.
Ang nasampit nga drayber mao si Henry Loay, diin gawas sa pasidungog gikan sa lokal nga panggamhanan sa Tagum, gitunolan sab kini og salapi gikan sa mismong tag-iya sa kuwarta.
Saysay ni Henry nga nakita niya ang bag sa Kilometer 55, National Highway sa Tagum City.
Butyag niini nga human niya makita ang bag, iya sa kuno kining gibitay sa iyang traysikel samtang gabiyahe sa pamasin nga dunay moduol ug mangutana kaniya kung duna ba siya'y nakit-an nga bag.
Giingon nga tungod kay way miduol, iya kining giablihan ug didto niya nakita nga kuwarta diay ang unod niini.
Sa maong hitabo, daling miadto si Loay sa City Mayor's Office aron ma-report ang bag ug mapanawagan ang tag-iya niini.
Dali sab nga nakontak ang tag-iya nga si alyas Gary ug suma niini nga nahagbong ang bag samtang nagdagan ang iyang motorsiklo, kinsa nagtuo nga naayo'g higot ang bag, apan naluag ug nahulog.
Niadtong mga taknaa, gilayong gisubay ni Gary ang iyang giagian apan pakyas kining makita ang bag.
Niya pa nga ang kuwarta gikan suma pa sa benepisyo sa iyang bag-ohay pa lamang namatay nga asawa.
Dako ang pasalamat ni Gary kang Henry ug naglaum nga ang hitabo kapanaminan sa ubang mga traysikel drayber.
Si Henry gitunolan sa tag-iya og pahalipay.