ARON makasinati pa sa kaluag sa presyo sa mga palaliton ang mga Dabawenyo, gilusad sa lokal nga panggamhanan sa Davao City ang "Kadiwa ng Pasko Market" sa Osmeña Park, Nobyembre 29, 2022.
Ang pag-abli gitambongan sa mga nagkadaiyang opisyal sa Dakbayan sa Davao ug nagkadaiyang grupo nga anaa sa business sector.
Sa pasko market makita ug mapalit sa ubos nga presyo ang mga baligyang pagkaon, dunay mga utanon ug mga lagutmon nga gikan pa sa kabukiran sa Davao City ug ubang mga produkto nga gama sa Dabawenyo.
Dugang pa nga ang merkado nagtumong sa pagtanyag og barato nga mga produkto sa pagkaon ug dili pagkaon sa publiko karong panahon sa Kapaskohan ug magsilbi nga agianan alang sa promosyon sa mga lokal nga produkto sa mga mag-uuma ug mangingisda ug sa mga micro, small and medium enterprises (MSMEs).
Ang Kadiwa ng Pasko gipasiugdahan sa Department of Agriculture pinaagi sa Agribusiness and Marketing Assistance Service, kauban ang Office of the President-Presidential Management Staff, Department of Trade and Industry ug Department of Labor and Local Employment.
Ang gihimong launching sa City Government of Davao sa Kadiwa ng Pasko market dungan sab sa ubang mga local government unit sama sa Panabo City, Mati City ug Monkayo sa Davao de Oro.
Nauna na sab nga nabuksan ang unang 11 ka mga Kadiwa ng Pasko markets ning bulana sa National Capital Region ug sa Koronadal City sa South Cotabato ug sa Tacloban City, Leyte.