Importante kaayo ang turismo sa ekonomiya sa Sugbo tungod kay daghang yanong mga lungsoranon nagsalig niini.
Panahon sa pandemic, grabe ang kalisod nga nasinati ning mao nga sektor tungod kay wa na may mga turista nga nanuroy sa ilang mga dapit.
Kon tan-awon, ang mga vendor bisan sa daplin sa kadalanan nabuhi sa mga turista. Ingon niana ka lawom ang kaayuhang dala sa turismo.
Si Gobernador Gwendolyn Garcia nihimong prayoridad sa turismo sa iyang pagpabuhi og balik sa ekonomiya sa Sugbo kay nasayod siya nga usa ni sa paagi nga makapanginabuhi og balik ang mga Sugboanon nga naa sa kalungsoran.
Karon, samot nang ma promote ang Sugbo human matudlo nga kalihim sa Dept. of Tourism si kanhi Liloan mayor Christina Garcia Frasco ubos sa administrasyon ni Presidente Ferdinand “Bongbong” Marcos Jr. Ang habagatang Sugbo sikat kaayo, labina ang whale watching. Apan ang nakapait kay kadaghanan sa mga karsada sa habagatan grabehang gubaa.
Ang national highway gikan sa Santander padulong sa Boljoon sama og sungkaan ang mga libaong. Sama sab sa bao ang pag-irog sa trabaho. Aron pagpalambo sa turismo, ang imprastraktura gikinahanglan kaayo. Ang kahapsay sa karsada dako og ikatampo sa pagpalambo sa turismo. Kinsa bay ganahan magsige og adto og dapit nga di maayo ang accessibility? Nakatampo pa sa kahuot sa trapiko ang trabaho.
Maayo man nga giayo ang mga karsada kay tinuod grabe na kaayo ang pagkaguba. Gubaon pang dan, naghuot pang mga sakyanan sa dalan. Panahon nang dukdokon sa mga local government unit ang Department of Public Works and Highways (DWPH) ining kahinay sa trabaho sa mga karsada nga gipang-ayo.
Di baya ang DPWH ang mag-antos, kon di ang mga LGU ug ilang mga konstituente, sama nianang tulo ka mga lungsod sa habagatan: Santander, Oslob ug Boljoon nga mga inila usab sa natad sa turismo.