Kapitan nga giakusahan nga nanghulga og silingan gironda sa kapulisan, nakuhaan og tag-as nga armas ug mga bala, alas 5:00 sa buntag sa Martes, Nobiyembre 29, 2022 sa Barangay General Climaco, dakbayan sa Toledo.
Si Richard Dejoras Candilada, 43, minyo, incumbent nga kapitan sa Brgy. General Climaco sa mao nga siyudad gipusasan tungod sa mga armas nga way lisensiya.
Si Police Major Nazarino Emia, hepe sa Criminal Investigation and Detection Group (CIDG)-Cebu Provincial Field Unit, maoy nangulo sa pagsikop kang Candilada, uban sa mga sakop Provincial Field Unit ( PIU-CPPO), 2nd Provincial Mobile Force Company (PMFC) ug Toledo City Police.
Si Emia nagkanayon nga si Candilada ilang gisikop pinasubay sa search warrant sa kalapasan sa ilegal nga paghupot og armas nga walay lisensiya.
Ang search warrant giisyu ni Branch 17 Presiding Judge Anacleto G. Debalucos sa Regional Trial Court (RTC) sa Cebu City, gipitsahan og Nobiyembre 24, 2022.
Narekuber sa kapulisan sa panimalay ni Candilada ang usa ka kalibre. 45 nga pistola nga dunay magazine nga puno sa pito ka mga bala ug usa ka unit sa .357 magnum revolver nga dunay unom ka mga bala.
Atol sa operation, nasikop sab ang bata-bata ni Candilada nga si Alnardo Cameneo Dejoras, 41, minyo, nagpuyo sa nahisgutang lugar.
Nakuha sa posisyon ni Dejoras ang usa ka KG9 rifle nga dunay 19 ka mga bala sa magazine.
Nasikop si Dejoras sa mga perimeter security personnel dihang milakaw nga nagdala og backpack diin gibutang ang KG9 rifle.
Si Emia nibutyag nga si Candilada gireklamo sa iyang mga silingan nga nanghulga.
Sumala ni Emia nga daw naibtan sa tunok ang mga residente sa lugar human nasikop ang kapitan.
Matod ni Emia nga sumala sa mga alegasyon sa mga tawo sa dapit, dunay panahon nga kon magabii na ug masugatan sila sa kapitan, giingong hulgaon sila kon di makauyon sa tawo. (GPL)