Giaprobahan na sa Konseho sa Dakbayan sa Talisay ang giduso nga P1.4 bilyunes nga budget alang sa 2023.

Si Bise Mayor Richard Francis “Choy” Aznar niingon nga wala nila usba ang mga gitagan-an sa budget ug giaprobahan kini sa tanang sakop sa Konseho atol sa ilang regular session niadtong Martes, Nobiyembre 29, 2022.

Siya niingon nga pipila ka mga department head gusto nga madugangan ang ilang alokasyon aron suportahan ang pipila ka mga programa, apan gipasaligan sila kaniadtong Martes nga ang Siyudad makapasar og supplemental budget kon gikinahanglan.

Ang social services nakakuha sa labing taas nga alokasyon nga P209 milyunes, gisundan sa development fund nga P198 milyunes, health services sa P98 milyunes ug disaster risk management nga P73 milyunes.

Matod ni Aznar nga gusto ni Mayor Gerald Anthony “Samsam” Gullas nga mapadayon ang serbisyo sa gobiyerno ngadto sa katawhan sa Talisay.

Samtang, si Edgar Mabunay, budget officer sa Talisay City Hall, niingon nga adunay pagkunhod sa ilang budget alang sa sunod tuig tungod sa coronavirus disease (Covid-19) kay milurang ang pandemic.

Ang budget sa Talisay alang sa 2022 kay P1.5 bilyunes, labaw nga P100 milyunes kon itandi sa P1.4 bilyunes nga budget sa 2023.

Hinuon gipasalig ni Mabunay nga ang pagkunhod sa gigahin nga budget dili makaapekto sa ilang mga serbisyo, nitataw nga ilang gisiguro nga ang pundo moadto sa kon unsa ang kinahanglan. (BBT / LMY)