Usa ka solemne nga seremonyas ug malinawon nga protesta gipahigayon atol sa ika-159 nga anibersaryo sa pagkahimugso sa amahan sa rebolusyong Pilipino ug bayani nga si Andres Bonifacio sa dakbayan sa Sugbo, Miyerkules, Nobiyembre 30, 2022.
Ang Cebu City Government nipahigayon og wreath laying ceremony kauban ang Armed Forces of the Philippines sa estatuwa ni Bonifacio sa Plaza Independencia.
Samtang, pipila ka mga cause-oriented nga grupo ang nagmartsa gikan sa Freedom Park sa Magallanes St. paingon sa Colon St. samtang ilang gipahungaw ang ilang mga kabalaka sa nagkalainlaing isyu sa katilingban.
Ang kalihokan sa City Government gipasiugdahan sa Cebu City Cultural and Historical Affairs Commission (CHAC) ug gitambungan nila ni Mayor Michael Rama, Bise Mayor Raymond Alvin Garcia, ug pipila ka mga konsehal sa dakbayan.
Sa iyang pakigpulong, gidasig ni Garcia ang mga batan-on nga tan-awon ang kinabuhi ni Bonifacio ug gamiton kini isip tinubdan sa inspirasyon.
Si Denwhil Cañete, vice chairman sa Anakbayan Cebu, nitug-an sa mga tigbalita nga ang tumong sa ilang protesta mao ang pagpahunong sa mga inhustisya nga nanghitabo sa nasud, ilabi na sa mga isyu kalabot sa red-tagging, pasismo sa estado, climate change, ug tawhanong katungod, ug uban pa. (IRT)