Usa ka mekaniko sa motorsiklo nga nag-sideline isip drayber sa habalhabal gipusil-patay, alas 11:00 sa gabii, Martes, Nobiyembre 29, sa Sitio Kadasig Phase 3, Brgy. Tisa, dakbayan sa Sugbo.
Si Major Janelito Marquez, hepe sa Labangon Police Station, niila sa biktima nga si Mark Ramil Bayang, 30, residente sa Sitio Culo, Brgy. Labangon.
Nasayran sa kapulisan gikan sa amahan ni Mark nga si Rodrigo Jaime nga ang biktima kanunay moadto sa maong dapit aron mag-ayo sa mga motorsiklo uban sa iyang kaubang mekaniko nga nagpuyo sa dapit.
Si Jaime niasoy sa kapulisan nga katapusang nakit-an ang biktima sa samang adlaw alas 8:00 sa gabii dihang ang naulahi nangayo og kuwarta kaniya aron ipalit og tambal sa iyang mga mata nga nagngolngol human naigo sa ceiling fan, gipakaon ang ilang mga salampati una pa nibiya.
Human niadto, gipahibawo na lang siya sa usa ka barangay tanod nga gipusil ang iyang anak sa Tisa.
Giadto dayon ni Jaime ang crime scene uban sa barangay tanod.
Nakuha sa Scene of the Crime Operation (Soco) ang usa ka kalibre .22 nga revolver nga adunay upat ka mga bala ug upat ka pakete sa gituohang shabu gikan sa biktima.
Ang pagkuha sa ebidensya gisaksihan sa amahan sa biktima.
Nakaangkon og samad pinusilan sa nagkadaiyang parte sa lawas ug ulo ang biktima.
Matud ni Marquez nga mohimo sila og makuting imbestigasyon sa pagpatay.
Matud niya nga nakadawat sila og impormasyon nga adunay gikaaway si Bayang sa wala pa ang insidente.
Si Jaime, sa laing bahin, niingon nga wala siyay ideya nga dunay nagdumot sa iyang anak. (BBT)