Patay ang usa ka barangay tanod ug unom ka tawo ang nangaangol sa karambola sa lima ka mga sakyanan, duha niini mga bus, sa alas 11:10 sa buntag sa Miyerkules, Nobiyembre 30, sa national highway sa Barangay Liki, lungsod sa Sogod, amihanang Sugbo.

Mga drayber sa bus nagbasulay kinsay sad-an.

Si Carlito dela Cerna, 66, minyo, tanod sa Brgy. Liki, Sogod, namatay sa alas 2:00 sa hapon sa Miyerkules sa tambalanan sa lungsod.

Ang mga angol giila sa kapulisan nga sila si Porferio Guerrero Pabuaya, 64, minyo, taga Jubay, Bohol; John Clourenz Lumingkit, 22, ulitawo, taga Sitio Tangke, Brgy. Dakit, Sogod; Alexis Karyle Lumingkit Flores, 17, taga Brgy. Dakit, Sogod; Cheraime Mondejar Magpuyo, 19, taga Brgy. Tuminhaw, Tuburan; April Kyle Latorre, 18, dalaga, taga Brgy. Liki, Sogod; ug Dindo Dizon, 47, drayber sa Ceres bus, taga lungsod sa Tabuelan.

Si Police Lt. Phil Restauro, hepe sa Sogod Police Station nga nahinabi sa Superbalita Cebu, nagkanayon nga ang Ceres bus nga gimaneho ni Dizon gisundan sa Autobus nga gimaneho ni Joseph Rabadan, hingkod, taga Brgy. Pitogo, lungsod sa Consolacion.

Matud ni Restauro, ang Ceres bus nilihay sa gikasugat nga awto nga paingon sa norte nga si Benny Lumapas, hamtong, taga Brgy. Polpogan, lungsod sa Consolacion.

Matud pa, nihunong ang Ceres bus apan gidaro sa giingong naghaguros nga Autobus.

“Paglihay sa Ceres bus, diretso sa pag-brake ang driver. Unya kusog man ang nagsunod nga Autobus maayong pagkadaro,” saysay ni Restauro.

Tungod sa kakusog sa impact, dugang sa hepe, ang Ceres bus nadusmo ngadto sa usa ka balay diin atol sab nga nagbarog sa gawas niini, daplin sa karsada, si de la Cerna nga naharos sa Ceres bus.

Ang Autobus nilahos sa pagbangga sa gikasugat nga awto ug pickup nga gimaneho ni Roy Booc, hamtong, taga lungsod sa Sta. Fe. Samtang ang boom truck nga gimaneho ni Arnel Rom, hamtong, taga Brgy. Pitogo, lungsod sa Consolacion, nga nagpaingon sa norte, nidumbol usab sa pickup.

Ang unom ka mga pasahero sa bus nakaangkon og minor injuries ug nakagawas gilayon sa tambalanan.

Matud ni Restauro, ang dapit accident prone kay dulhugon ug blind curve.

Ubay-ubay na ang na disgrasya sa maong lugar, dason niya.

Dugang ni Restauro nga sa ilang imbestigasyon, nitumaw nga ang drayber sa Autobus ang sad-an, apan gitulod usab niini ang drayber sa Ceres bus, kun way nangangkon sa duha kinsa ang sad-an.

Kasamtangan nga gikustodiya sa kapulisan ang lima ka mga drayber sa mga sakyanan alang sa dugang imbestigasyon.