Mga duwa karon:
3:00 pm- San Miguel batok Meralco
5:45 pm- Rain or shine batok Magnolia
Langkaton og suway sa Magnolia Chicken Timplados Hotshots ang No. 2 nga luna ug katapusang twice-to-beat nga bintaha sa ilang pagpakigsangka sa Rain or Shine Elasto Painters sa main game karong hapon, Disyembre 2, 2022, sa Philippine Basketball Association (PBA) Commissioner’s Cup sa Philsports Arena.
Ang Hotshots kasamtangang naa sa ikaduhang luna dala ang 9-2 nga rekord sunod sa league-leader Bay Area Dragons, nga ninghuman sa ilang tahas sa elimination round dala ang 10-2 nga rekord.
Mahinungdanon alang sa Hotshots nga modaog ning sangkaa aron hingpit nilang malansang ang No. 2 nga puwesto.
Ang mopatigbabaw nga duha human sa elimination round mao ang makakuha og twice-to-beat nga benepisyo sa quarter-finals.
Kon mapilde ang Hotshots, hayan magtabla sila sa Brgy. Ginebra Gin Kings sa 9-3 nga rekord.
Ning sitwasyuna, ang Gin Kings maoy makaangkon sa No. 2 gumikan kay ilaha mang nalupig ang Hotshots, 103-97, sa ilang engkuwentro niadtong Oktubre 23, 2022. Ang winner-over-the-other maoy ipatuman ning maong senaryo.
Sa ilang habig, grabe sab ka mahinungdanon alang sa Elasto Painters ang pagbuntog sa Hotshots tungod kay mao kini ang magselyo sa ilang pagsulod sa quarter-finals.
Kon mapilde ang Elasto Painters, hayan delikado pa silang maapil sa tapok sa mga manamilit og sayo.
Sa premirong duwa, magsangka ang San Miguel Beermen ug Meralco Bolts sa usa ka non-bearing game.
Ang Beermen natanggong nang daan sa No. 5 ug dili na matay-og ang ilang puwesto bisan unsa pa’y resulta ning duwaa.
Ang Bolts, nga adunay 4-7 nga rekord, wala na’y paglaom nga makaabante.