Tan-awa ang bag-ong diskohan nga gidayo karon sa mga batan-on tungod sa kadako sa lugar nga naa ra sa baybayon.
Ang Roadside 21 makita sulod mismo sa Wiggy’s Beach Resort sa Barangay Fatima, Jubay, Liloan mao nga sadsad to the max ang beach dance party kauban pa ang Cebu Mix Club DJs, plus live band, mga kan-anan ug siyempre ang dagat nga bukas 24 oras sa inyong katagbawan.
“We named it Roadside@21 because that’s the kilometer distance from Cebu city to Barangay Jubay and it’s just along the highway,” matod pa sa magtiayong Architect Noel ug Analie Malazarte nga maoy nagduma sa bag-ong party place sa amihanang bahin sa Sugbo.
Gawas sa naandang mga lamesa ug beach cottages nagtukod sab sila og 3-storey building nga mao ang “Wiggys Inn” nga dunay 15 fully-airconditioned rooms (P1,500/day).
Ang entrance fee: P20 sa buntag ug P50 (kon dunay disco/banda). Aduna silay pito ka food stalls sama sa Paluto Ta Bay (bbq and silog), Duday (mga bilao and Filipino), Mr. Shakers (milktea and coffee), Habhab (panga and seafoods) ug uban pa.
Ang Wiggy’s dunay gilapdon nga halos 4,000 square meters ug katunga niini maoy gihimong diskoral (powered by Pregoner Audio) ug duna pay laser lights.
Taudtaud na silang nag-operate apan niadto lang Sabado, Nov. 26 sila nag-grand opening tungod sa kadaghang gipuno nila sa lugar.
Ang Wiggy’s ang usa sa mga labing karaan nga beach resort sa Liloan ug ning maong kalamboan siguradong makapabibo ni sa turismo nga maoy gi-promote karon sa kanhi mayor sa Liloan ug karon Kalihim sa Turismo nga si Christina Garcia Frasco.
“Kasagaran magpusot-pusot og abot ang mga tawo dinhi mga alas 10 na sa gabii. Dunay mag-overnight sa beach, mag-disco, maminaw sa banda, mokaon, mag-inom, mag-sing-along kay duna man sab mi videoke rooms,” dugang ni Archt. Malazarte.
Ang ilang disco ug acoustic band ipahigayon kada-weekend o kon dunay okasyon sama gabii (Nov. 30) kay holiday duna silay acoustic band. Apan sa pagkakaron ang ilang disco gi-limit lang una sa alas 10 sa gabii nga maoy gitugot sa barangay ug IATF.
Ang Wiggy’s gawas nga regular host sa mga beach volleyball tournament modawat na sab sila og mga dagkong bookings sama sa Christmas party, debut, wedding reception, reunion ug concert.
Gawas nga 24 oras ang ilang security, may mga tanod nga mag-roving kay atbang ra sila sa Jubay Barangay Hall mao nga luwas ra gyud ang lugar.
UNSAON PAG-ADTO?
Kon mag-commute ug gikan mo sa siyudad sa Sugbo, anha sakay sa SM City Cebu og jeep o aircon bus (P40-P50 ang pamlete) nga dunay rota nga Jubay, Liloan.
Kon duna moy service, sayon ra ninyo ning matultolan gamit ang waze. Ang Wiggy’s Beach Resort mga two kilometer ra ang gilay-on gikan sa San Fernando El Rey church ug Municipal Hall sa Liloan. Tara na! /