Ang Cebu City Anti Indecency Board (Caib) mobalik na usab sa ilang aktibong partisipasyon para maminosan, kon dili man mabatokan, ang malaw-ay nga mga presentasyon, pasundayag nga dili maayo sa panan-aw ug pandungog sa publiko.
Si Mayor Michael Rama nitudlo sa iyang kanhi City Administrator nga si Dr. Lucelle Mercado aron subling pangulohan ang Caib kinsa maoy nakapahunong kaniadto sa mga ‘hubo-hubo’ ug palami nga mga suwat sa peryodiko ug mga drama sa radyo.
Si Mercado nagkanayon nga napasirad-an sab nila ang duha ka entertainment bars, massage parlors, naka-takedown og billboard ug signage gumikan sa paglapas sa City Ordinance 1408 niadtong ikaduhang termino ni Rama gikan sa 2013-2016.
“I would say that we will give the same intensity or even more to fight against indecent, lewd presentations by any platforms to limit if not to totally stop the actions that violate our Caib ordinance because the members that composed the previous board were the same people that our mayor has called upon,” matud ni Mercado.
Niadtong Huwebes, ang Caib nagtigom sa ikaduhang higayon aron ilang han-ayon ang mga aksyon nga ilang ipatuman sa umaabot nga mga adlaw.
Si Mercado niingon nga base sa ilang nasabotan, mohangyo sila ni Rama nga mahatagan sila og espasyo aron maoy butangan sa mga dokumento o masakmit nga mga ebidensiya sa ila unya nga ipahigayon nga mga operasyon.
Ang Caib nga nihingusog sa ilang mandato atol sa duha ka mga termino ni Rama apan wala gi-convene sa panahon ni kanhi mayor Tomas Osmeña (2016-2019) ug padayon nga inactive sa duha ka tuig ni kanhi mayor Edgardo Labella.
Karon subli nga mohingusog sa ilang operasyon karong Enero 2023.
Matud pa ni Mercado nga mosugod na sila og himo og inspeksyon sa entertainment bars, massage parlors, mohimo og monitoring sa programa sa radyo, television, newspapers, magazines, x-rated DVDs, sex toys, billboards, signages ug uban pa.
Ikaabag ni Mercado sa Caib silang Atty. Aida Sanchez, Atty. Matet Casiño, Atty. Cherry Roble, Atty. Allan Geotina, City Councilors Phillip Zafra ug Franklyn Ong, Carol Diola, Yting Edperidion, Joy Balboa, CCPO Director Ireneo Dalogdog, Department of Education ug Sangguniang Kabataan.