Di ikalimod nga daghan sa ato ang nangita og paagi para mapugngan ang pagsaka sa edad gikan sa pagpa-kolor sa buhok para matabunan ang uban, pagpataod og postiso o retainer para ma porma ang ngipon, pagpa-inject og glutathione para moputi, pagpa-facelift para mainat ang kunotkunot sa nawong o pa-inject og stem cells para mobalik pagkabata ang hitsura ug kalagsik.
Ang proseso sa pagpugong sa pagta-as sa edad para di daling matiguwang sama ra sa nagdakop og hangin kay ang atong lawas, sa madawat nimo o di, nagtubo man kada adlaw maong ayaw na lang usik-usiki imong panahon kay di man gihapon kini mapugngan.
Ang angay hinuon buhaton mao ang pagdawat sa katinud-anan ug pag-usab sa kaugalingong panlantaw nga ikaw, sa imong kahamtong karon, mao ang bag-ong maanyag.
Angay ika-maya nga naabot ka pa ining edara kay ang uban intawon nimong mga higala o kaila dugay nang mipanaw sa dayon tantong panggamit ug pagdapat og mga chemical sa lawas nga mao hinuoy nakaingon sa disgrasya.
Unaha paghatag og pagtagad ang imong kaugalingong kalipay una ang sa uban bahala og unsay ikasulti sa mga marites kay kining nagpalibot nimo wa may labot ug apil sa imong kinabuhi.
Sa tinuod lang, di nimo maratsada og paghatag og kahimuot ang tanan kay kini sila busy man sab og pangita og paagi sa pagpalipay sa ilang kaugalingon.
Nobody is perfect unya wa say bisag usa nato nga way problema maong di angay ikumparar ang kaugalingon sa uban. Lainlain ta og agianang gitadlas unya matag usa nato dunay diskarte para mahiluna ug mabuhi.
Insakto nang panultihon nga way makakita kon duna kay nabuhat nga insakto apan daghan ang makakita ug mahinumdom kon masayop. Busa sa sunod, kever, buhata imong gustong buhaton nga sa imong pagtuo insakto kay ang importante nga kontento ug nalingaw ka sa resulta ini.
Kining atong kinabuhi hinuwaman ra unya wa gali ta’y kasiguruan kon makamata pa ugma busa isaulog ang tanan nimong gasa karon kun sa English pa-Eat, Love and Pray.