Disyembre na gyud, ang labing malipayon nga buwan sa tuig. Laing kahigayonan sa pagsaulog sa pagpakatawo sa atong Manunubos.
Malipayon kita tungod kay panahon usab kini sa pagpanghatag og gasa. Alegre nga tradisyon. Buwan usab nga tingdawat og bunos alang sa mga kawani sa mga pribado o publikong buhatan ug kompaniya. Alang sa mga makadawat sa ilang bonus, hinumdomi kanunay ang karaang pasidaan - dili magpatuyang og gasto aron dili unya mahisama sa ‘one day millionaire’, apan mobalik og suwa og ginamos pagkaugma.
Busa himoa kining panahon nga usa ka bag-ong opurtunidad nga mahaw-as sa utang, sinugdanan sa pagtigom o paglig-on sa pinansyal nga kapasidad. Labing maayo nga makagahin gikan sa kuwarta nga nadawat nga mapatubo pinaagi sa pagbubo og puhonan ug pagtukod bisan unsang ginagmay nga negosyo.
Dunay mga ahensiya nga makatabang sa pagpalambo sa atong panginabuhi gamit ang salapi nga nahipos gikan sa nadawat nga bonus. Ang mga banko dunay tanyag nga abag sa buot mobubo og puhonan sama sa stock market ug uban pa alang sa gagmay nga mamuhonan.
Ang Department of Trade and Industry (DTI), Department of Agriculture (DA) ug ubang ahensiya sa kagamhanan dunay mga livelihood program nga pwede maapilan. Dili ba bag-ong opurtunidad matag Disyembre? Magdepende lang gyud kini sa atong prayoridad ug diskarte aron maluwas gikan sa paglunang sa kalisdanan.
Timan-i, ang kuwarta lisod pangitaon apan sayon kaayong gastuson labi na ning panahon sa Pasko nga daghang kalingawan ug mga lumalabay lang nga palaliton. Saktong maglipay usab kita sa atong hinagoan sa trabaho sa tibuok tuig, apan sa pikas bahin, maghunahuna kita nga dunay lain nga atong latason. Wala kita masayod sa umaabot nga hagit nga atubangon.
Ang pagpalig-on sa pinansiyal nga kapasidad kabahin sa atong pagpangandam aron dili mahulog sa naandang sitwasyon nga uwahi na ang pagmahay.