Patay nga lawas sa usa ka lalaki nga gibaatan ang ulo og sako sa lawog sa manok, gibinaklid paggapos ang mga kamot ug gigapos sab ang mga tiil nakaplagan.
Ang biktima gituohang gi-salvage bisan kon sa pasiunang pakisusi way nakitang mga samad pinusilan o dinunggaban ang kapulisan.
Ang maong lalaki nga gibana-bana nga anaa sa pangidaron nga 40 anyos pataas napalgan sa kilid sa Transcentral Highway (TCH) sa Sityo Tupas, Barangay Taptap, Siyudad sa Sugbo.
Matud ni Police Major Alvin Llamedo, hepe sa Talamban Police Station sa Cebu City Police Office (CCPO), nga ang lugar mingaw.
Ang dapit ubos na sa Police Community Precinct (PCP) sa Adlaon apan sakop gihapon sa Talamban Police Station.
Nadawat nila ang alarma alas 7:00 sa buntag sa Biyernes, Disyembre 2, 2022 pinaagi sa tawag ni Barangay Kapitan Bryan Bontuyan sa Taptap.
Nadiskobrehan sa mga tawo sa dapit ang lawas pasado alas 6 sa buntag.
Sa pag-imbestigar sa kapulisan sa PCP Adlaon, walay nakaila sa biktima.
Nakapalisod pa sa pag-ila kay wa kini bisan usa ka identification (ID) card.
Hinuon ang biktima dunay tattoo nga manok igtatari nga anaa sa tuong bukton.
Sa paghiling sa mga sakop sa Scene of the Crime Operation (SOCO), wa pa silay nakitang samad pinusilan o dinunggaban busa wa wad-a ang pagtuo nga kini gituok.
Wa say nadunggan nga mga buto sa armas ang mga residente.
Dugang ni Llamedo nga layo usab sa mga balay ang lugar hinungdan nga way nakamatikod dayon nga dunay tawo nga gilabay sa dapit.
Sa pag-contact sa Superbalita Cebu kang Llamedo sa mga alas 5 pasado sa hapon sa Biyernes, wa pay tagtungod nga niila sa lawas nga naa sa St. Francis Funeral Homes gihipos.
Sa pangutana kon di ba kaha nangawat ang biktima sa dapit, matod ni Llamedo nga di pa siya makasulti, apan ila kining susihon.