MAS gihingusgan pa sa Land Transportation Office (LTO)-Soccsksargen ang kampanya batok sa mga hubog nga drayber aron malikayan ang disgrasya atol sa kapaskohan.
Kini ang gipadayag ni LTO-Soccsksargen Regional Director Macario "Bong" Gonzaga base na sab sa mando sa LTO Law Enforcement Service Central Office nga higpit nga ipatuman ang Republic Act 10856 o Anti-Drug Driving Act.
Base sa datus sa LTO-Soccsksargen, nisaka ngadto sa 546 ang natala nga aksidente sa kadalanan gikan sa Enero hangtud Oktubre ning tuiga, diin 489 ka mga drayber ang nakainom og ilimnong makahubog.
Kini itandi sa 73 ka aksidente sa kadalanan niadtong Enero hangtud Disyembre 2021.
Gawas sa LTO, lakip usab ang kapulisan ug MMDA ang gitahasan sa pagdakop sa mga hubog nga drayber samtang ang mga masakpan ipaubos sa field sobriety tests.
Sa Soccsksargen, dugay na kining gipatuman sa LTO ug karon mas palig-onon pa.