LAING pasidungog ang nadawat sa City Government sa Kidapawan nga nagpamatuod sa maayong pangatungdanan ug epektibo nga liderato sa mga lokal nga opisyal sa dakbayan.
Ang pasidungog nga bag-o lang nadawat sa dakbayan mao ang National Anti-Drug Abuse Council Performance Award 2021 nga gitunol sa National Anti-Drug Abuse Council (Nadac).
Ang Dakbayan sa Kidapawan maoy unang nipaubos sa performance audit nga gihimo sa Nadac ug malampuson kining nakapasar sa assessment and evaluation (functionality points) sa natad sa anti-illegal drug campaign ug uban pang programa ug inisyatibo sa pagsumpo sa ilegal nga druga.
Ang lokal nga panggamhanan sa Kidapawan gipasidunggan usab sa maayong koordinasyon sa mga ahensiya sa gobyerno nga nagpasiugda sa kampanya batok sa ilegal nga druga sama sa Department of the Interior and Local Government, Philippine Drug Enforcement Agency, Dangerous Drugs Board , Department of Health ug non-government organizations.
Kini bisan pa sa mga problema ug hagit nga giatubang sa kagamhanan sa dakbayan sa pagtabang sa mga drug addict nga gustong magbag-o sa ilang kinabuhi o persons who used drugs (PWUD).
Samtang ang ubang lugar sa probinsiya sa Cotabato nga nalakip isip awardees mao ang mga lungsod sa Carmen, Magpet, Pigcawayan, President Roxas, Banisilan ug Arakan.
Samtang gikalipay ni Mayor Jose Paolo M. Evangelista ang nadawat nga pasidungog ug nagpasalamat sa tanang lokal nga opisyal lakip na ang kanhi mayor ug karon Senior Board Member sa Second District sa Cotabato Joseph A. Evangelista sa ilang paningkamot nga mapalig-on ang programa batok sa ilegal nga druga ug maluwas ang kinabuhi sa katawhan, ilabi na sa mga batan-on.