IMPAS ang tulo ka mga tawo sa dihang gidaro ang sakyanan nga nabuthan og ligid ngadto sa motorsiklo alas 3:45 sa hapon Huwebes, Disyembre 1, 2022, sa Kabacan, Cotabato Province.

Giila ang mga biktima nga namatay nga mao sila Jomar Damanda ug iyang igsuon nga si Marissa nga sakay sa motorsiklo.

Samtang patay sab si Alawiya Manda, 82, negusyante nga sakay sa Toyota Innova nga nabuthan sa ligid.

Sa taho gikan sa Kabacan Municipal Police Station, nibuto ang ligid sa unahan sa sports utility vehicle ug nawad-an og kontrol sa manobela ang drayber niini hinungdan nga gidaro ang kasugat nga motorsiklo sa Sitio Basak, Barangay Kayaga sa nahisgutang lungsod.

Dead on the spot ang magsuong Damanda nga sakay sa motorsiklo samtang ang negusyante daling gidala ngadto sa balay tambalanan apan namatay gihapon.

Gikanayon sa mga nakasaksi sa aksidente nga kusog ang dagan sa Toyota Innova ug nag-ikis-ikis kini una nidaro sa kasugat nga motor.

Hinuon misurender ngadto sa kapulisan sa Kabacan Municipal Police Station ang drayber sa SUV.