BOLUNTARYO na ang pagsul-ob og face mask sa mga siradong lugar sa Siyudad sa Davao.
Kini human nga gipirmahan na ni Mayor Sebastian Duterte sa Siyudad sa Davao ang executive order (EO) aron ang paggamit sa niini opsiyonal na lang human ang duha ka tuig nga pag-atake sa Covid-19 pandemic.
Gihimo ni Duterte ang pagpahibawo atol sa pagbukas sa Pasko Fiesta Huwebes sa gabii, Disyembre 1.
"Ganiha, gipirmahan nako ang EO supporting the executive order [EO] of President Bongbong Marcos Jr. nga optional na ang atong indoor ug outdoor sa pagsuot sa face mask," butyag sa mayor.
Kahinumdoman nga nagpagawas si Marcos niadtong Oktubre 28, 2022 og EO 7 nga nagtugot na sa boluntaryong paggamit sa face masks sa indoors taliwala sa pandemya.
Ilawom sa EO 7, ang paggamit og face masks sa indoors ug outdoors opsiyonal na lang gawas lang sa mga healthcare nga pasilidad, sama sa klinik, ospital, laboratoryo, nursing homes aug dialysis clinics; medical transport vehicles sama sa ambulansiya ug paramedic rescue vehicles; ug public transportation sa kayutaan, kahanginan ug kadagatan.
Ang mga senior citizens, indibiduwal nga dunay comorbidities, immunocompromised nga mga tawo, mabdos nga mga babaye, walay bakuna nga mga indibiduwal ug mga tawo nga nagpakita og mga simtomas sa Covid-19 padayon pang gidasig nga magsul-ob og face masks ilabi na sa mga publikong lugar.
"As a result of continued immunization, countries around the world have been instituting measures such as reopening or international borders, and relaxation of health and safety protocols and requirements, resulting in immediate positive impacts to their economies," subay sa EO.
Apan bisan pa sa pagpahibawo, giawhag gihapon ni Duterte ang katawhan nga magsul-ob og face mask.
"I still strongly encourage nga suot gihapon mo, pero it's optional," pagklaro niya.
"Congratulations sa atoa nga nigawas na gyud ta sa pandemya," dugang pa niya.
Sukad sa pagsulat niini, ang siyudad wala pa moisyu sa publiko og EO nga nagsagop sa EO sa nasudnong kagamhanan.
Ang Konseho sa siyudad wala pa sab makasagop sa giamendahan nga EO sa paggamit og face masks. (RGL)