Naa man tuod niya ang bintaha, apan di gyud angay nga mohatag og luna sa kompiyansa si Vergil Vitor sa iyang unang pagdepensa sa World Boxing Organization (WBO) Oriental Super Featherweight title batok sa Koreanong challenger nga si Dong Kwan Lee.
Ang duha mag-abot karong Huwebes, Disyembre 8, 2022 sa main event fight sa ikawalong edisyon sa Kumong Bol-anon boxing series nga ipahigayon sa Calape Coliseum, lungsod sa Calape, Bohol, lima ka adlaw gikan karon.
Nakabintaha ang 25-anyos nga gianggaan og Valiente gumikan kay anaa man sa iyang tugkaran ang away ug ang tingog-suporta sa iyang kataga lungsod maoy usa sa makapadasig unya kaniya ibabaw sa ring.
Kon eksperiyensiya ang basehan, dili ra iglagyo ang ilang record. Si Vitor, lumad nga taga Tagbilaran City, 21 na nakaaway, duha ang pildi, ug adunay 12 ka knockouts. Samtang si Lee, 20 na usab nakaaway, 16 ka daog, duha ang pildi ug duha usab ang tabla. Aduna lang siyay pito ka knockout nga kadaugan.
Sa pamarog, mas taas og gamay ang 30 anyos nga si Lee, 5-7 1/2, samtang si Vitor, 25-anyos, may gitas-on nga 5-6 lang.
Ikaduha naman tuod ning away ni Vitor og langyaw nga kontra, apan kini maoy primero niyang pagpakigsangka og Korean fighter. Sa atong online interview, si Vitor mitug-an nga ila nang naestudyohan ang estelo ni Lee ug ila na kining napangandaman.
Di man tuod power puncher ang Koreano apan, sa gihapon, iyang girespetohan ang kalidad niini. “Kita nako sa iyang fight, ug sa iyang style. Dili man ingon nga power puncher, pero as always, Sir, di ko mag kompyansa. Akong girespito gihapon ang skills sa akung kuntra,” ni Vitor pa kinsa mipasalig nga dili gyud problema ang iyang timbang.
Dili bag-o sa Korean ang pagpakigsangka og Pinoy kay ang uwahi niyang duha ka away nga pulos iyang gipangpukan mga Filipino fighter man sab.
Pero dili kini angay ikabalaka ni Vitor kay ang mga Pinoy nga gipangpildi ni Lee pulos man mga ihawonon.
Si Roemart Sentillas nga iyang gi-knockout sud sa ikaduha nga round niadtong Agusto 13, 2022 adunay 11-9 nga record samtang si Michael Landero nga napukan pinaagi sa unanimous decision niadtong Nobiyembre 2021 naghupot og 19-16-4 nga baraha.
* * *
Gawas sa Vitor-Lee fight, laing big time card ubos sa PMI Promotions ang nakahan-ay na usab sa Bohol. Sa Pebrero 25, sunod tuig, si Reggie Suganob gikatakdang mosakbang ni Mark Vicelles sa Omega Boxing Club alang sa International Boxing Federation (IBF) title eliminator.
Si Floriezyl Echavez Podot, ang Big Boss sa PMI, mitug-an nga gidawat sa Omega ang ilang counter offer nga sila na lang ang mo-promote sa away, hinungdan nga wala na lang kini ipaagi og purse bidding.
Midugang si Podot nga dako ang posibilidad nga anha kini nila ipahigayon sa dakbayan sa Tagbilaran nga magsilbing laing dugtong sa ilang boxing series.
Mao ni nakanindot karon sa Bohol. Kon kaniadto ang Cebu adunay Ala Boxing Club nga nakahatag og dekalidad nga mga boxing promotions, karon ang Bohol anaa na usab silay PMI Promotions nga daw og sa maoy nakasunod sa lakang sa Ala Boxing Gym.