Vallena: Mga hagit sa bikers

Vallena: Mga hagit sa bikers

Sa tibuok Pilipinas, dunay 200,000 ka mga tawo nga nanag-iya og biseklita nga gigamit niini nga transportasyon sa ilang pagtrabaho. Kana lang ang nakita nga gidaghanon sa mga nanag-iya og biseklita.

Kana ra sab ang gituohang gidaghanon sa biseklita, wa pa maapil ang mga mountain, road, gravel ug fat bike. Sa akong estimate, sobra sa 1 million ang tigbiseklita sa Pilipinas, apan manggawas lang kon weekend ug holiday ang bikers.

Ang rason kon nganong di kaayo daghan ang mogamit og biseklita? Tungod kay ang atoang mga karsada gi-design nga alang lang sa mga sakyanan, wa alang sa tawo ug biseklita. Car-centric ra kaayo.

Tan-aw ra gud kon duna bay sidewalk ang mayoriya sa atoang kadalanan? Wala. Kon naa man, ang local government units (LGU) wa magtagad ani mao nga dunay naninda ug dunay mga establisemento nga naghimo sa sidewalk nga tipik sa ilang estruktura.

Naa man unta nang five-meter road easement apan sa gihapon, wa napatuman sa mga building official ug LGU. Busa, ang mga tawo tapulan molakaw kay kinsa man say di mahadlok masaghiran og sakyanan nga nahaguros ang dagan?

DAGHAN UNTA

Kon ang atoang mga karsada bike ug pedestrian friendly pa, daghan ang magbiseklita ug daghan ang manglakaw. Di unta daghan ang mangasakit kay tipik sa healthy lifestyle ang biking ug walking.

Bisan ako nga dugay na nga nag bike, kuyawan na ko sa kadaghan sa mga sakyanan sa kadalanan nga mohadyong og agi. Ang road condition karon ug lima ka tuig ang nakalabay, lahi ra kaayo.

Kon kaniadto kaming bikers sayon ra kaayo molusot sa kadaplinan, karon ang mga nagmotorsiklo mao nay amoang kakompetensya. Akoy nakuyawan magtan-aw sa biseklita ug motorsiklo.

Kon sa una sayo pa lang sa buntag daghan na ang magsakay sa bike, karon anha na sagad sa weekends. O mosayo og maayo sa karsada, kanang medyo ngitngit pa aron di maabtan sa daghang mga sakyanan sa buntag.

BISAN SA HAGIT

Taliwa sa kalisod sa karsada, padayong nagtubo ang komunidad sa bikers. Daghan ko og nakit-an sa kadalanan nga bisan alas 5 pa lang sa buntag nagsikad na. Nagkadaghan ang nag bike sa highways, labina sa weekends.

Nalipay kong nagtan-aw.

Nalipay sab ko magtan-aw sa mga social media post sama sa cycling cebu nga naay pictures ug video sa mga trail ride. Sayon ra kaayong tan-awon but makapakuyos sa ilawom niadtong di kaayo hanas sa downhill, sama nako.

Okay ra ning tig downhill kay kasagaran naay masakyan padung sa bukid diin adto sila manghunong sa lugar nga duol asa sila padung.

Taliwa ning mga hagit sa kahimtang sa atoang mga karsada, nagpabilin nga buhi ang atoang komunidad sa mga mahiligon og biseklita bisan way klarong suporta sa kinabag-an sa local government units (LGU).

Hinaut pang sa umaabot nga katuigan, makaamgo na ang kagamhanan sa ka importante sa biking.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph