Human gilibkas sa Land Transportation Franchising and Regulatory Board (LTFRB) 7 ang mga special permit, daghang mga sumasakay ang maapektuhan, labina niadtong naa sa mga rota nga wa paagii og public utility vehicle (PUV) sa wala pa ang pandemic.
Daghan sa mga call center worker ang sayon na lang kaayo nga maka report sa trabaho padung sa IT Park kay daghang mga public utility vehicle (PUV) gikan sa nagkadaiyang lokalidad mosangko na sa usa sa mga dapit sa dakbayan sa Sugbo nga naay daghang business process outsourcing (BPO) offices.
Matod sa LTFRB nga naa na sa mga local government ang pagtiwas ug pagduso sa ilang route plan kay ila man kining gimbuhaton.
Unta, gihuwat sa LTFRB nga mahuman pagduso ang mga LGU sa ilang route plan kay makaluluoy ang mga pasahero nga sa kalit lang, maglisod na og sakay tungod kay wa na ang mga PUV nga nag-agian sa ilang dapit atol sa pandemic.
Back to normal na man kuno, pero ang gidaghanon sa pampublikong mga sakyanan kuwang kaayo itandi sa wa pa moigo ang pandemic sa sayong bahin sa 2020 busa, di normal ang kahimtang sa public transport.
Gamay ra kaayo sa karaang public utility jeepney (PUJ) ang nakabalik human sa physical evaluation sa Land Transportation Office (LTO).
Kon kaniadtong daghan pang tradisyunal nga PUJ naglisod gani pagsakay, unsa na kaha karon nga gibawi na ang special permits?
Hinaut pang irekonsiderar sa LTFRB ang ilang desisyon ug dalion sab sa mga LGU paghuman ang ilang mga route plan.
Maayo man ang kadaghanan sa mga opisyal sa kagamhanan kay dunay mga sakyanan, kon di man gani office service, dunay kaugalingong sakyanan.
Apan ang yanong mga trabahante mag-antos pa sa pagpangita og kasakyan, mag-antos pa sa dako kaayong pletihan. Nagkalisod pa, gidugangan pang kabug-at sa gipas-an nga suliran.