Aron mahatagan og kahigayonan nga makakat-on ug maatiman ang pagtuon sa kabataan sa gamayng isla sa dakbayan sa Danao, nilagda og kasabutan ug ni-unveil sa marker ang Kagamhanan sa Danao, Danao City police, Dunggoan barangay officials ug pribadong sektor nga Republic Cement Danao timaan sa ilang panagtambayayong ug panagtinabangay.
Ang Isla Verde sa dakbayan sa Danao usa ka gamay nga komunidad nga gikinahanglan pa nga tabukon pinaagi sa sakayan.
Aron makatungha ang mga bata, gikinahanglan pa nga molawig ang mga ginikanan aron mahatod sa gagmay’ng mga bata sa daycare center sa sentro.
Pipila kanila dili na lang mopatungha sa mga bata tungod kay ilang unahon ang pagpanginabuhi nga mao ang pagpangisda.
Subay niini, gitinguha sa Kagamhanan pinaagi sa City Social Welfare and Development Office (CSWDO) nga butangan og daycare center ang isla tungod usab sa nagkadaghan nga population sa dapit.
Nagtuo usab ang CSWDO nga dunay mga aktibong day care workers ug maayong programa ang dakbayan alang sa kabataan.
Nagtinguha ang kagamhanan nga mahuman kini pinaagi usab sa pakigtambayayong sa Republic Cement, Barangay Dungguan ug building owner sa maong luna aron mahatagan og edukasyon ang mga bata samtang nanginabuhi ang mga ginikanan.
Sa kasamtangan, adunay 61 ka mga child development centers sa 42 ka mga barangay ang dakbayan. (ANV)