Gusto sa usa ka konsehal sa dakbayan sa Sugbo nga idili na ang mga bulgar ug sexually depicting nga mga baligya sa mga malls ug ubang shopping area samtang nagkaduol ang holiday season.
Si Konsehal ug abogado Rey Gealon nihangyo sa Cebu City Anti-Indecency Board (Caib) nga susihon ang mga shopping area ug sakmiton ang mga “law-ay nga baligya” ug bulgar.
Sa iyang sulat nga gipadala ngadto sa pangulo sa Caib nga si Dr. Lucelle Mercado sa Biyernes, Disyembre 2, 2022, si Gealon niingon nga aduna nay pagdagsang sa lainlaing mga baligya sa mga organ sa sex sa tawo ug paghulagway sa mga buhat sa sex nga gikulit sa kahoy ug uban pa.
Dugang pa ni Gealon nga kining mga matang sa mga produkto dayag nga gipakita sa mga bazaar, stalls, ug ubang commercial spaces bisan sa mga malls.
“If this goes unabated, children who are frequenting the malls and other business establishments this yuletide season, together with their parents and elders, will be shocked and appalled at the mere sight of it,” matud ni Gealon.
Ubos sa City Ordinance 2436, ang Caib gimugna aron tan-awon ang mga butang nga may kalabotan sa kalaw-ay ug pornograpiya sa bisan unsang porma sa dakbayan sa Sugbo.
Gisilotan sa ordinansa ang tanang responsable sa pagbaligya niining mga malaw-ay nga butang nga multa nga dili molapas sa P5,000 o pagkabilanggo nga dili molapas sa unom ka bulan o pareho.
Ang Kagamhanan sa Dakbayan mahimo usab nga mopahamtang og dugang administratibong silot sama sa pagsuspenso o pagbawi sa mga business permit sa establisemento. (IRT)