Nailhan na ang patay nga lalaki nga napalgang gilabay daplin sa karsada sa Transcentral Highway sa Sitio Tupas sa bukirang barangay sa Taptap, dakbayan sa Sugbo niadtong Biyernes sa buntag, Disyembre 2, 2022.
Si Major Alvin Llamedo, hepe sa Talamban Police Station, niingon nga ang biktima mao si William Orger Guinocor, 45, ug residente sa Sitio Fatima, Brgy. Apas sa maong dakbayan.
Matod ni Llamedo, ila pang gisulayan ang pag-ila sa mga responsabli sa pagpatay kang Guinocor.
“Base sa among follow-up investigation, tiggamitan og shabu ang biktima. So, we’re looking at drugs as a possible motive for his death, but that doesn’t mean nga dili na ta motan-aw sa ubang anggulo,” matod niya.
Sa dihang nadiskobrehan ang lawas ni Guinocor, gigapos ang iyang mga kamot ug tiil.
Nagtuo ang kapolisan nga siya usa ka “salvage” nga biktima.