Patay ang usa ka lab-asero human pusila sa iyang silingan sa Barangay Gunting sa habagatang lungsod sa Barili, Sugbo pasado alas 11:00 sa buntag niadtong Sabado, Disyembre 3, 2022.
Giila ang biktima nga si Eric Tampos, 38. Nakaangkon kini og samad pinusilan sa ulo.
Si Staff Sergeant Jeffrey Alpas sa Barili Police Station niingon nga ilang nasikop ang gunman nga ilang giila nga si Joselito Languido, 62, ug mag-uuma.
Matod ni Alpas, nag-inom ang biktima sa balay sa suspek dihang nahitabo ang insidente.
Sa dihang nahubog na sila, naglalis sila, matod niya.
Gibutyag niini nga posibleng wala makabantay si Tampos nga mikuha si Languido og pusil ug gipusil kini sa ulo ug sa lawas.
Nakadawat sila og impormasyon nga si Languido maoy sponsor sa kasal ni Tampos hinungdan nga nagkasuod sila ug kanunay silang mag-inom.