Kritikal ang kahimtang sa usa ka pulis atol ning pagsuwat human pusila samtang nisuway og buwag sa away sulod sa disko sa Purok Tambis, Barangay Lawis, lungsod sa San Remigio, amihanan sa Lalawigan sa Sugbo sa kaadlawon niadtong Dominggo, Disyembre 4, 2022.
Si Staff Sergeant Jade Carabuena, 38, residente sa maong dapit, gipusil sa likod nga bahin sa ulo.
Wala pa masayod ang kapulisan kon kinsa ang responsabli, apan lima ka persons of interest (POIs) ang ilang gitan-aw.
Si Major Wendell Abellana, hepe sa San Remigio Police Station, niingon nga si Carabuena nitawag sa ilang hotline mga alas 2:00 sa kaadlawon aron i-report ang kasamok ug mangayo og backup.
Si Abellana niingon nga ang mga silingan ni Carabuena nangayo kaniya og tabang human nahitabo ang away sa sayaw sa kasilinganan nga gipahigayon tabok sa balay sa naulahi.
Matod ni Abellana, diha pa sa linya si Carabuena dihang gibutang niya ang iyang kaugalingon taliwala sa mga tawo nga nag-away.
“Nakurat ang among mga personnel dihang nihunong siya sa pagsulti. Ang sunod nilang nadunggan mao ang mga tawo nga nagsiyagit nga dunay napusilan,” asoy niya sa Cebuano.
Tungod niini nagpadala dayon sila og mga operatiba sa lugar, matod niya.
Sa dihang naabtan sa kapolisan, si Carabuena nagkadugo nga nagbuy-od na sa yuta, 10 ngadto sa 15 metros gikan sa iyang balay.
Gibutyag ni Abellana nga ilang ipaubos sa paraffin test ang lima ka POI aron mailhan kon kinsa ang mibira sa gatilyo.
“Gusto sab namo nga masiguro sa testigo kon kinsa kanila ang mipusil sa pulis kay ngitngit kaayo ang lugar,” dugang niya.
Si Carabuena na-confine sa usa ka pribadong tambalanan sa dakbayan sa Sugbo.
Sa pinakaulahing impormasyon nga nadawat ni Abellana, nitaroy pa ang bala sa ulo sa pulis.