Dili mominos 150 ka mga balay sa Sitio Wangyu, Barangay Mambaling, dakbayan sa Sugbo ang naugdaw sa sunog niadtong Dominggo sa kaadlawon, Disyembre 4, 2022.
Si FO3 Emerson Arceo, imbestigador sa Cebu City Fire Office, niingon nga mokabat sa P3.7 milyones ang gibanabana nga danyos diin kadaghanan sa mga balay hinimo sa kahoy.
Matod niya, ilang giisa ang unang alarma ala 1:49 sa kaadlawon, ang ikaduhang alarma, alas 2:07 sa kaadlawon ug nakontrolar ang sunog paglabay sa usa ka oras sa wala pa kini napalong alas 3:36 sa kaadlawon.
Dugang ni Arceo nga nagsugod ang sunog sa balay sa pamilyang Cenabre.
Sa inisyal niyang imbestigasyon, nibuto ang usa ka e-tricycle nga gikargahan og kuryente. Gibiyaan kini nga wala maatiman.
Samtang, alas 10:30 sa buntag, laing sunog ang niigo sa Sityo Dapdap sa Barangay San Nicolas, nga niugdaw sa tulo ka mga building nga walay tawo. Gibanabana nga P9 milyunes ang danyos.
Matod ni Arceo, ilang giisa sa unang alarma sa alas 10:35 sa buntag ug nakontrolar ang sunog alas 10:48, sa wala pa gideklarar nga fire out paglabay sa duha ka minutos.
Gidugang niya nga di pa nila masuta ang hinungdan sa maong sunog.