“Yang makibalu Kanaku anting e mibait, anting alang kamumulan,

anting Kakataskatasang Panginwan ding sablang labwad—ya,

e melibo libutad ding tau, mikabus ya karing sablang kasalanan.

Katalinwan, belwan, katimawan king pamikakunu at kalibawan, kapatawaran, pangamakatutwan, pamanampat king sarili at kataimikan, tula at kasakitan, beytan,

kamatayan, takut, kelangtakut, kelangkatampalasanan, katatagan, kasapatan,

pamagdimut, pamidake, pangabantug at kalausan Aku mu ing kabud linalang.

Ding pitung mangabyasa at bayu ila ding aliwang apat a mangabyasa

at ding Manu [pipimpunan ding ketawan] misapwak la king isip Ku,

at ding sablang lelangan king labwad ayti menibatan la karela.

Ninu mang makibalu king ligayang ayni at upaya Ku darapat yang alang-salat

a makatagulaling a kasuywan; kaniti alang kapikakunwan.

Aku ing pigmulan ding sablang makadiwa at makayatung labwad.

Segana-gana manibatan Kanaku. Ding byasa a makibalu kaniting kisnang kapantasan

darapat makaparikil a kasuywan kanaku layun sasamban da Ku kabilugan ding pusu ra.

Ing pamisip ding dalise kung talasuyu magsantung la Kanaku,

ing bye da makasuku Kanaku, at manikwa lang maragul a kasapatan

at ligayang mipanaslag karelang tunggal-tunggal at mipagsalita la dikil Kanaku.

Karelang parating susuyu at sasamba Kanaku king pamalsinta,

pagkalub Ku karela ing pamisanak nung makananu lang miras Kanaku.

Kapamilatan ning pakalulu Ku karela, Aku, makatuknang karing pusu ra,

lalasakan ku kapamilatan ning maslag a sulugi ing dalundum

a misapwak king kelambelwan.”

~ Dalit ning Kaktaskatasang Panginwan | Dangka 10: 3-11

(The Song of God 10: 3-11)

***

Dakal lang mibansagang byasa at malawak belwan a sikat king kekaban ning panaun king yatung ini. Deti mipaparangalan la karing miyayaliwang paralan—aklat ning amlat, pipasyagan at karing galame ning paralang panglipunan o social media king kasalungssungan. Dakal la ring tuturing dang iti bukal king sarili da at ditak la mu karela ding utangan da’t kikilalanan a lamak ning Ginu iting sabla. Meging bunga ding pemandapat king milabas o pigkalub na anting pakalulu ning Ginu agyang karing masasabing e karapatdapat uling e la memagaral.

Inya pin sa’deti asno katas lub, nung e la man mapangaya o paratut at isipan da a likas karela ing byasa at alang aliwang penibatan iti nung e king sarili dang likas at agnan misapwak a kegiwan. Inya mu naman keraklan karela alang balikid o pasalamat a susukli king Miglalang at Pegmulan da. Keraklan karela uli ning ketasan da lub maging alang Dyos a kikilalanan karas ning tuktuk ning para karela tagumpe da. Malilyari ing tiktak na la kaparatutan.

Makanyan man—kalubkuban ing bye da at ding pusu da ala lang kapaynawan.

Ing kaparatutang iti malilyari e mu karing mesabing alang kikilalanan a Dyos nung e pati na karing pamuntuk ding miyayaliwang mitatag a aguman ning kasalpantayanan. Inya sa’t atin karela ing bala atin lang karapatang managkas o malmura karing karelang tuturing a kasalang ba’la mung lunto sari belwan at gelingan king pamitaltalan. Mangabaldugan a ipagmaragul dang ila banal la inya sa’t malawak la belwan at atin na lang karapatang palmuran do reng buri dang palmuran. Bala da mirinan lang karapatan king Ginu bang gawan da iti karing para dang tau.

Isipan da reng mesabing byasa at dakal a belwan a ala lang kaylangan karing aliwa at pati na king Dyos at ila deti ring makikaylangan karela. Bala da agyu da na ngang pakibatan ing sablang kutang, lutasan ing sablang kaligaligan at kagusutan at agyu da na ngang gawan ing sablang masulit. E da balung nanu mang belwan da at kegiwan peparam namu ning Ginu karela at bilang galal karing nanu mang depat dang pupupulan da mu pauli ning karelang kalma o dapat king milabas.

Pakalulu ngan iting pigkalub ning Panginwan karela—kekatamu ngan.

***

Dake Talabaldugan:

1. mimipe (pangdiwa) ating sakit ipe, masakit a ating ipe. English – ill or infected with measles. Alimbawa king pamangamit: “E la kanu dapat miyayanginan deng mimipe uling malyari dang ikamate nung murung la reng ipe da.”

2. mimipnu (pangdiwa) kakasna, kakatmu, maybug o malapit nang lumapo laman. English – getting filled up, becoming full, stuffed, sated, replete, surfeited, gorged. Alimbawa king pamangamit: “E ya pa mu rin bisang tuknang mangan i Bertu agyang mimipnu ne anggang batal keng kabsi na inya uyta mengapanyuka ya.”

3. mimiral (pangdiwa) malilyari, mamabibye king metung a karinan, labwad o aliwang dane king sikluban. English – existing, subsisting, visible and perceptible but not necessarily living or having life; keeps going, making do. Alimbawa king pamangamit: “Agyang mimiral ya ing metung a bage o lelangan, e mangabaldugan a mabye ya iti.”

***

MIKASING-KABALDUGANG at MISALUNGAT

KABALDUGANG AMANU TAMU

manyampukaki – kinasnang nanu man a makasalbag king metung a dake ning katawan.

manyampilak – anti king manyampukaki dapot maralas magagamit keng dinat katawan.

mamayutputan – impun a kinasnang bungang sabit-sabit kareng sanga. Maybug na lang manakbag neng asno kadakal.

lapo-lapo o lalapo – kasna keng dakal a laman ning metung a datukanan a lalabis keng asbuk na ning mekad oya, tapayan o nanu mang lulanan.

kasnang-kasna o binang kasna – labis-labis a laman a lulanan. Magagamit mu naman king panamdam ding tau.

mipnung-mipnu o binang mipnu – mengari king kasnang-kasna. Lumang amanung makakalingwan na.

sapak a sapak – mengari king kasnang-kasna at sapak a sapak. Salitang dalan.

sapasapunggul – awig keng mamayutputan dapot makatipun lang bunga king metung mung sanga, kesa king laganas a impun.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.