Ang Department of Social Welfare and Development Field Office VII (DSWD-7) nilusad sa resulta sa Listahanan third round household assessment niadtong Disyembre 1, 2022 sa Bai Hotel Hotel sa dakbayan sa Mandaue.
Giimbitar atol sa paglusad ang nagkadaiyang National Government Agencies (NGAs), District Representatives, Provincial Local Government Units (PLGUs), Local Government Units (LGUs) ug partner Non-Government Organizations (NGOs).
Ang ikatulong assessment gipatuman niadtong 2019, nga naglangkob sa kinatibuk-ang 1,078,079 ka mga panimalay sa rehiyon, nag-assess sa 236,783 ka mga panimalay sa Bohol; 566,710 ka mga panimalay sa Sugbo; 255,107 ka mga panimalay sa Negros Oriental; ug 19,479 sa Siquijor.
“Tomorrow, we will officially present the number of identified poor households in the region out of the 1,078,079 assessed households,” matud ni DSWD 7l Director Shalaine Marie Lucero.
Gilista sa DSWD ang tanang panimalay sa rural-classified barangays ug pockets of poverty sa urban-classified barangays.
“The household was assessed based on their composition, the household members’ highest educational attainment and occupation, features of the housing structure and access to basic services or facilities like water, electricity, and sanitary toilet, households’ ownership of assets, tenure status of housing among others,” paambit ni Lucero.
Dugang pa niya nga ang tanang nakolekta nga impormasyon gikan sa panimalay miagi sa proseso gamit ang siyentipikong pamaagi nga gitawag ug Proxy Means Test o PMT.
Ang PMT usa ka istatistikal nga modelo nga nagbana-bana sa kita sa usa ka panimalay base sa mga variable nga gilakip sa porma sa pagtagsa sa panimalay.
Ang mga panimalay nga adunay gibana-bana nga kita nga labaw sa pinakaulahing provincial poverty thresholds gikonsiderar nga dili kabus ug kadtong adunay gibanabana nga kita nga ubos sa poverty thresholds gikonsiderar nga kabus.
Samtang, ang Listahanan makamugna og estatistika sa gitumong nga mga kabus nga panimalay ug pamilya, wala kini maghatag og opisyal nga estatistika sa kakabos.
Ang opisyal nga estatistika sa kakabos gi-release sa Philippine Statistics Authority (PSA), nga naghatag og datos sa kakabos ug mga insidente sa subsistence base sa poverty ug food thresholds.
Uban sa tema nga “Bawat Bahay Magkakasama sa Kaunlaran,” ang Listahanan database mahimong ipaambit ngadto sa lainlaing ahensya sa nasudnong gobyerno, local government units, ug ubang organisasyon/stakeholders nga nag-implementar sa social protection programs ug services.
Ang Listahanan o ang National Household Targeting System for Poverty Reduction (NHTS-PR) usa ka administratibong himan nga nag-ila kon kinsa ug asa ang mga kabus nga panimalay sa nasud.
Kini ang ikatulong higayon nga gihimo ang Listahanan household assessment. Ang unang Listahanan household assessment gihimo niadtong 2009 ug ang ikaduhang household assessment niadtong 2015. (PR)