NAGYAWYAW nga nipauli ug desidido nga mopasaka og kaso ang 42-anyos nga misis kinsa gilabayan og kaldero sa iyang kumare human gipaninglan sa utang niini sa lungsod sa New Bataan sayo sa buntag niadtong Dominggo, Disyembre 4, 2022.
Kini maoy gisaysay ni alyas Melba, kinsa niasoy sa Superbalita Davao nga ang iyang silingan nga gipatago sa ngalang alyas Tasya nagkabulingit og takuling sa kaldero dihang nipauli sa balay human naningil og utang.
Matud pa nga giadtoan ni alyas Tasya ang iyang kumare aron singlon sa utang niini nga P1,000. Apan giingong nasuko kini ug inay nga mobayad, gilabayan na hinuon og kaldero nga way hugas si alyas Tasya.
Maayo na lang kay nasagang ni alyas Tasya ang milupad nga kaldero apan maoy nagkabulingit ang iyang mga kamot ug ang ubang takuling nanglupad sa iyang nawong ug lawas.
Tungod niini, naglungot-lungot sa kasuko si alyas Tasya samtang nanghilam-os aron makuha ang mga takuling ug dayong nag-ilis pag-usab kay niadto sa balay sa kapitan sa barangay aron ireklamo ang iyang kumare.
Apan niabot ang bana sa nanglabay og kaldero ug nangayo og pasaylo sa nahimo sa iyang asawa ug nagkanayon nga nag-init ang ulo sa asawa gumikan kay nabuntagan siya og pauli sa balay ug ang iyang suweldo nahurot sa inom uban ang mga barkada.
Mihangyo ang bana nga di na lang paabton sa barangay ang hitabo ug misaad nga siya ang mobayad sa utang sa iyang asawa kay duna siyay madawat nga 13th month sa ikaduhang semana ning bulana.
Sa pagsuwat ning balita, wa pa masayri kung misugot si alyas Tasya sa hangyo sa bana sa iyang kumare.