Kapulisan sa dakbayan sa Sugbo nagpaabot sa kabanay sa unom ka mga tawo nga taga Ozamis City nga giingong gi pick up sa mga nagpailang pulis sulod sa usa ka motel sa sitio Nasipit, Barangay Talamban, Cebu City niadtong Septiyembre 26, 2022.

Unang mireklamo sa buhatan ni Senador Raffy Tulfo ang kabanay sa usa sa unom nga na missing.

Gisakay, matud pa, ang mga biktima sa usa ka puti nga van ug wala na masayri kon diin dad-a ug wala usab mo contact sa ilang mga kabanay.

Ang mga na missing giila sa kapulisan nga sila si Jessica Piang, Mary Cris Ello, Marvin Carballo, Sheilla Mae Duhaylungsod, usa ka alyas Sitay ug usa ka alyas Buyong.

Matod ni Police Major Alvin Llamedo, hepe sa Talamban Police Station, nga duha ka adlaw human sa insidente, diha pa ni-report sa ilang buhatan ang manager sa motel aron mosusi kon duna bay police operation diin ang ilang guest nalambigit.

Apan tungod kay way operation ang kapulisan sa dakbayan sa Sugbo nga ang target naa sa sulod sa motel, gi blotter lang sila nga missing person.

“Ang naghatag sa report regarding missing person ang manager after the incident sa September 26. Missing person lang kay according to him alleged police operation daw,” matod ni Llamedo.

CCTV wa mogana

Si Police Colonel Ireneo Dalogdog, hepe sa Cebu City Police Office (CCPO), nimando kang Llamedo paglusad og occular inspection sa dapit aron masayran kon duna bay mga ebidensiya nga makuha.

Sa inisyal nga pakisusi sa kapulisan, nasuta nga dunay CCTV camera ang establisemento apan wala mogana ug wala usab nila makuha ang plate number sa sakyanan.

Gidugang ni Llamedo nga labing maayo nga moanhi sa dakbayan sa Sugbo ang mga reklamante aron masugdan na nila ang full blown investigation uban sa laing unit sa kapulisan sa Central Visayas.

Gipangsusi na usab ang tanang unit sa kapulisan ug laing ahensiya sa gobiyerno apan wala silay gilusad nga operasyon.

Nagtuo ang CCPO nga migamit na usab sa ngalan sa ilang ahensiya ang mao nga mga tawo aron maglibog ang nag-imbestigar.

Sa Septiyembre 10, 2022 nagsugod og check-in sa motel ang walo ka mga tawo apan pagka Septiyembre 11 ni out ang duha ka kauban.

Giingong nagbantay sila sa usa ka babaye nga operahanan sa tambalanan.

Gipangsubay na karon sa mga imbestigador ang mga silingang establisemento kon duna bay mga CCTV camera nga nakakuha sa giingong puti nga van nga maoy gisakyan sa mga biktima.

Lakip sa ilang susihon ang mga background sa gipangdagit aron didto sila magsugod sa ilang imbestigasyon.