Usa ka inahan gipasakaan og daghang mga kaso sa National Bureau of Investigation (NBI) Central Visayas samtang gi-rescue ang 4-anyos nga anak niini nga giingong gipahubo ug gibaligya ang mga hulagway ngadto sa usa ka langyaw.
Nasubay ang inahan nga taga Brgy. Suba, dakbayan sa Sugbo human nasikop ang langyaw nga giingong iyang gibaligyaan sa mga hulagway.
Sa pamahayag sa NBI-7 ngadto sa mga tigbalita, nasubay ang inahan tungod sa pagkasikop sa Norwegian national nga si Raymond Harper tungod sa paghupot og nagkadaiyang child sexual abuse materials (CSAMs) sa iyang gadgets niadtong Hunyo 28, 2022 sa operasyon sa NBI Manila.
Sa dugang pagsusi, nasayran nga ang hubo nga mga hulagway sa mga bata gikan sa numero nga giingong gipanag-iya sa inahan nga gipaagi sa Whatsapp.
Nagsugod pagbinayloay og messages ang inahan ug si Harper niadtong Hunyo 23, 2022 hangtod sa Hulyo 1, 2022.
Ang inahan mo-send og hubo nga mga hulagway sa mga bata ug bayran kini ni Harper.
Ang bata nga nakita sa hulagway nailhan nga anak diay sa suspek.
Sa Nobiyembre 30, 2022, nihimo og rescue operation ang NBI-7 inabagan sa Department of Social Welfare and Development (DSWD), Department of Justice Inter-Agency Council Against Trafficking (DOJ-IACAT) sa Barangay Suba, dakbayan sa Sugbo.
“It was evident that the subject offered her child for the purpose of sexual exploitation with the use of ICT or Information and Communications Technology. Subject utilized social media platform to offer the minor-victims to paying foreign customers for the purpose of production and selling of CSAEMs in exchange for money,” mabasa sa pamahayag sa NBI-7 sa Disyembre 5, 2022.
Ang inahan wala gi-detain tungod kay walay nakuhang mga CSAM gikan kaniya.
Gipasakaan hinuon siya og kasong may kalapasan sa RA 9208 o Trafficking in Persons Act of 2003, nga giamendahan sa RA 10364 o ang Expanded Anti-Trafficking Persons Act of 2012 in relation sa Section 6 sa Cybercrime Prevention Act of 2012.
Lakip usab ang kalapasan niini sa RA 7610 o Special Protection of Children Against Abuse , Exploitation and Discrimination Act; RA 10175 o Cybercrime Prevention Act of 2022 ug Republic Act 9775 o Anti-Child Pornography Act of 2009.
Una nang nasikop ang inahan sa kasong may kalambigitan sa pagpamaligya sa iyang mga manghud nga babaye nga maghubo ug kuhaan og hulagway apan nakagawas human niatras ang pamilya niini.
Sa kasamtangan, gihuwat sa NBI-7ang warrant of arrest sa suspek alang sa pagdakop kaniya.