Nahimo dayong bayani si Kawhi Leonard sa iyang pagbalik og duwa gikan sa pagkaangol (right ankle sprain) ug naagak niya sa kadaugan ang Los Angeles Clippers pinaagi sa iyang 18-foot jumper sa nahabiling 1.4 segundos batok sa host Charlotte Hornets, 119-117, kagahapon, Disyembre 6, 2022 (PH time) sa National Basketball Association (NBA).

Nagkanayon ang 5-time All-Star nga nindot kaayo ang iyang pamati nga hingpit na nga naalim ang iyang angol, nga nagpadaplin kaniya sulod sa taas nga panahon.

“I don’t think anybody loves playing this game more than me,” matod ni Leonard, kinsa niamot og 16 puntos alang sa kadaugan.

“It gives me joy when I’m able to play. And it was great that I was able to make that shot.”

Si Leonard wala nakaduwa sa tibuok miaging season tungod sa iyang angol sa tuhod unya sa iyang pagbalik ning maong season, naangol sab dayon siya sa ikatulo pa lang nga duwa sa Clippers.

Ang laing All-Star sa Clippers nga si Paul George nibalik na sab pagduwa gikan sa pagkaangol (strained hamstring) ug nimugna kini og 19 puntos aron pangulohan ang kadaugan.

Balanseng ataki ang gihimo sa Clippers ning kombatiha aron putlon ang ilang duha ka sunodsunod nga kapildihan ug isaka ang ilang rekord sa 14-11, ikaunom sa Western Conference.

Niamot og 13 puntos matag usa sila si Reggie Jackson ug Nic Batum alang sa Clippers, nidugang og 12 puntos ug 12 ka assists si John Wall samtang si Luke Kennard, kinsa nibalik sab gikan sa pagkaangol, nitampo og siyam ka puntos.

Sa pagbalik nila ni Leonard, George, ug Kennard, gilaumang mohanoy ang kampanya sa Clippers.

“This is really a great opportunity to kind of get back on track,” batbat ni George. “We were playing well when we were healthy and now we can start building toward the team we were trying to be.”

Ang Hornets, nga nahagbong sa 7-17 nga rekord, gipangulohan ni Kelly Oubre pinaagi sa iyang 28 puntos samtang nidugang og 26 puntos si P.J. Washington. (AP)