MOHATAG og ganti nga balor og P20,000 ang mayor sa Montevista, Cyrex Basalo, kun si kinsa ang makatudlo sa tawo o mga tawo nga nagpakatap sa social media kabahin sa pagsuspende sa klase niadtong Lunes, Disyembre 5, 2022.
Gibutyag nga natingala ang mga empleyado sa lokal nga panggamhanan sa Montevista human nga nanggawas sa tagsa-tagsa nila ka mga tunghaan ang mga estudyante sa publikong eskuwelahan sa lungsod kon diin ang uban nanuroy ug nagpa-picture sa Municipal Ground kung asa gipahitabo ang Diwanag Festival.
Sa gihimong pakipaghinabi sa SuperBalita sa mga estudyante, ilang gibutyag nga gipapauli sila sa tagsa-tagsa nila ka mga mangtutudlo gumikan sa gipaguwang "advisory" nga gipakatag sa social media nga nagkanayon: "Due to torrential rains experienced in the municipality and upon recommendation of the Municipal Disaster Risk Reduction Management Office (MDRRMO) and to ensure the safety of all school children. Students, teacher and non-teaching staff, classes at all levels for all school are hereby suspended today, December 5, 2022 (Monday). BDRRMC’s are hereby instructed to monitor current situation and Coordinate and submit timely report to MDRRMO" kung diin giingong "upon the directives" ni Mayor Basalo, ang MDRRMC chairperson.
Apan sa gihimong pagsubay sa LGU, nasuta nga ang maong advisory kinopya ug gi-edit ug dili matuod nga gikan kini sa lokal nga panggamhanan sa lungsod.
Matud pa nga mibuhos ang mga negatibong reaksiyon ug mga komento sa social media human nga nagpagawas sa ilang opisyal nga pamahayag ang lokal nga panggamhanan nga dili matuod ang maong advisory.
Si Jenecar Paderanga sa iyang komento sa FB siya nagkanayon, "wala'y konsensiya ui, pareha sa amoa nga taga bukid nag-eskwela sa Montevista, niuli lang ang estudyante kay walay klase tas fake news ra diay, dili ra ba lalim kay sayo mogikan, sayo maligo, gasto tas mobiyahe pa unya mouli ra nga walay hinungdan, makasuya ui."
Samtang sa komento sab sa usa ka Lizelda Angelica: "Kinsa man pod ng nagbu-ot buot og announce nga walay klase?...grabe ka distubo sa iyang gibuhat, wala’y klaro gyud."
Og tungod sa maong hitabo, wa'y pagduha-duha nga migahin og ganti nga balor og P20 mil si Mayor Basalo kung si kinsa ang makatudlo sa tinubdan sa maong sayop nga impormasyon.
Tinguha sa mayor nga mahatagan og legal nga aksiyon ang sayop nga binuhatan nga nakapaukay sa mga estudyante ug magtutudlo sa eskuwalahan.