LAUMAN sa mga Dabawenyo nga dunay mga umaabot pang mga grasya nga ilang madawat gikan sa buhatan sa kongresista sa unang distrito ning siyudad sa Davao.
Kini human nga dul-an 2,000 ka barangay functionaries, lakip na ang mga opisyal, nakadawat sa ilang pinaskohan niadtong Lunes, Disyembre 5, gikan sa Office of First Congressional District Representative Paolo "Pulong" Duterte.
Ang anak ni Rep. Duterte nga si Rodrigo "Rigo" Duterte II ang nangulo sa gift-giving program pinaagi sa pagpanghatag og pinaskohan sa tanang barangay functionaries ubos sa First Congressional District Office isip kabahin sa kick-off para sa yuletide season.
Gipadayag sa usa ka konsehal sa barangay nga si Bing Apa ang iyang kinasingkasing nga pagpasalamat ngadto kang Rep. Duterte ug sa iyang anak nga si Rigo nunot sa ilang unang mga gasa karong panahon sa yuletide. Dugang pa niya nga dako na nga tabang ngadto kanila ang maong regalo.
Ang unang batch sa mga barangay functionaries nga nakadawat og regalo gikan sa Talomo Proper, Matina Crossing, ug Bucana 76-A sa Poblacion District. Adunay sab 8,860 ka barangay functionaries ang gipaabot nga makadawat og pinaskohan gikan sa First District Office.
Ang 41-anyos nga si Elda dela Rosa, taga Barangay 76–A, wala makapugong sa iyang kalipay sa pagkadawat sa regalo. Matud niya nga wa siya magdahom nga makadawat siya og sayo nga regalo sa Pasko ug mapasalamaton siya sa tibuok grupo sa batan-ong kongresista.
Ang buhatan ni Rep. Duterte niingon nga ang gift-giving program mao ang paghatag sa tanan og Merry Christmas bisan pa sa mga bug-at nga responsibilidad ug mga hagit nga naagian sa tanan gikan sa nangaging katuigan hangtud karong bag-o.