Gipahibawo ni Cebu Governor Gwendolyn Garcia nga ipatuman na ang “HimSugbo” kun Himsog Sugbo nga programa sa Kapitolyo alang sa mga indigent nga Sugboanong pasyente sa mga district ug provincial hospitals sa lalawigan.
Matud ni Garcia nga sa kasamtangan gipaspasan ang pagtarong sa sistema alang sa pagpanso sa mga Quick Response (QR) codes sa mga resita nga pirmahan sa mga doktor ug ubang mga hingtungdan.
“Its already being implemented...I think the system is still being perfected but we will be able now to start the implementation,” matod ni Garcia.
Sa Disyembre 10-11 ning tuiga gikatakda ang pagpahigayon og medical mission sa lungsod sa Argao ug dakbayan sa Carcar diin sugdan na paggamit ang mga QR coded prescriptions.
“...mao nay atong gitarget so that kadtong kinahanglan nila nga tambal i-issue na lang sa QR coded nga prescription slips para mapalit sa mga indigents,” dugang ni Garcia.
Ang prescription nga ihatag sa attending physician, nilagdaan sa social welfare personnel ug chief sa hospital may QR code nga mahimong i-scan na lang sa mga partner merchants magdepende sa giresita sa doktor.
Moabot sa 40 ka mga botika ug suppliers sa Sugbo ang nilagda og kasabutan tali sa Kagamhanan sa Lalawigan sa Sugbo aron libreng makapalit ang mga kabus.
Sa nasayran nga mokabat sa P85 milyunes ang pundo nga ipagawas sa Probinsiya sa Sugbo alang sa bag-ong programa.
Ang P50 milyunes sa pundo magagikan sa Office of the President ug ang P35 milyunes gikan sa Department of Health (DOH). (ANV)