Walay bisan usa ka kontrabando nga nakuha ang mga operatiba sa Philippine Drug Enforcement Agency (PDEA) 7ug kapulisan atol sa gilusad nga kinalit nga greyhound operation sa Cebu City Jail male dormitory ug sa Medellin District Jail sa lungsod sa Medellin, sa kaadlawon sa Martes, Disyembre 6, 2022.
Sukwahi kini sa nanglabay nga mga greyhound operation diin mga pinutos sa illegal nga drugas, mahait nga hinagiban, cellular phones ug ubang kontrabando ang nakuha sa kapulisan ug PDEA-7.
Matud ni Leia Alcantara, information officer sa PDEA-7, nga sa Medellin dunay nakuha nga gamay nga kwarta gikan sa selda sa pipila ka mga person deprived of liberty (PDL).
“As per report sa atoang team nga nag conduct og search and seizures walay mga nakuha nga contraband, walay illegal drugs, wala pud daw bladed weapons and cellphones. Ang sa Medellin duna lay nakuha nga mga ginagmay’ng kwarta, considered daw to nga contraband. Naa man gud na silay coupons daw so bawal ang money,” matud ni Alcantara.
Giangkon ni Alcantara nga ang naghangyo sa greyhound operation sa duha ka jail facilities mao ang Bureau of Jail Management and Penology (BJMP) aron malimpyohan ang ilang mga bilanggoan batok sa nagkalainlaing kontrabando.
Sa pangutana kon wala ba mo-leak ang impormasyon ngadto sa mga binilanggo, matud ni Alcantara wala sila magduda sa BJMP nga nasayod ang mga PDL labot sa operation nga maoy hinungdan nga limpyo na ang sulod sa selda nga daw sa gipangandaman sa mga binilanggo.
“Wala ra, Sir. We trust man pud sa atong BJMP. Dako kaayo tag pagsalig sa BJMP noh and as I’ve mention kining wala kay ma-seized, dili na siya ingon nga dili ni siya always nga indication nga murag na leak, naay nasumbong. But on the positive side, indication ni siya nga sakto ang pagdumala sa management sa ilang facility,” dugang ni Alcantara.
Sa miaging mga dakop sa anti-illegal drug operation sa kapulisan, giingong gikan sa sulod sa Cebu City Jail ang ilang contact.
Gani dunay mga ngalan nga gipangtug-an gamit ang cellular phone sa pagpadagan sa illegal nga drugas.
Apan ning maong kinalit nga greyhound walay nasakmit ang team sa PDEA nga bisan usa ka cellphone.
Usa sa mga police official sa Central Visayas nga dili lang magpahingalan mitug-an ning tigbalita nga lisud na karon ang pagpahigayon og greyhound operation tungod kay kinahanglan pa nga mokuha og pagtugot sa Department of the Interior and Local Government (DILG).
Kini human sa duguong hitabo sa Leyte Provincial Jail sa Baybay City diin napatay sa sulod sa selda ang mayor sa Albuera nga si Rolando Espinosa niadtong Nobiyembre 5, 2016.
Sukwahi kaniadto nga mamahimong diha-diha na pahibaw-on sa kapulisan ug PDEA ang BJMP nga molusad sila og kinalit nga greyhound operation aron paglikay nga mo leak kini sa mga PDL. (AYB)