Ang law of supply and demand ang gitumbok nga hinungdan kon nganong mahal ang baligya sa sibuyas bombay sa mga merkado dinhi sa Sugbo.
Kini ang gipadayag ni Assistant Secretary Salvador Diputado sa Department of Agriculture (DA) kinsa maoy gitahasan sa pagdumala sa Region 6, 7 ug 8 aron mapatuman ang mga programa sa maong ahensiya.
Si Diputado nagkanayon nga ang Sugbo walay kaugalingon nga suplay sa bombay ug nagsalig lang sa produkto gikan sa laing mga lalawigan.
Si Wynne Cenas, market administrator sa dakbayan sa Sugbo, niingon nga niabot na og P290 matag kilo ang sibuyas bombay sa Carbon Market niadtong Nobiyembre 6, 2022.
Matod ni Cenas nga usa sa iyang gitan-aw kon nganong mahal ang presyo niini gumikan sa wala pagsulod sa imported nga mga sibuyas bombay.
Si Diputado niingon nga ang usa sa mga solusyon sa pagmahal sa presyo mao ang pagpasulod sa imported nga onions apan nabalaka sab sila nga maapektohan ang lokal nga mga mag-uuma.
“Kon mosulod sa Pilipinas ang import (onions) mao nay rason makapalit na pud tag barato kay barato man ang import kay sa local produce. Usa na sa i- balance namo (sa DA). While we understand the needs of the consumers, we also considered the situation of the local farmers,” pasabot ni Diputado.
Ang ASec sa DA nagkanayon nga alang kaniya padayon nga epektibo ang P170 nga suggested retail price (SRP) gikan sa ilang ahensiya kon pananglit wala pay bag-o nga presyo nga giduso isip bag-ong SRP ang DA.
Apan iyang gipasabot nga ang matag local government unit adunay gitawag og Local Price Coordinating Council nga maoy magtakda sa SRP, morekomendar ug sila sab ang mo-monitor sa mga baligya sa merkado ug mogukod sa mga mapahimuslanon sa higayon. (PAC)