Mananggiti nga wala kaaguwanta kay asawa “nagsabaksabak,” lalaki nga gidudahang kabit gitigbas sa alas 7:50 sa gabii sa Dominggo, Disyembre 4, 2022 sa Brgy. Abucayan, lungsod sa Balamban.

Mga ngan sa biktima, suspek ug asawa gipugngan ning mantalaan.

Si Lito (di tinuod nga ngan), 59, buwag sa asawa, usa ka construction worker, taga Brgy. Abucayan, samdan sa wala nga bukton ingon man ulo human tigbasa sa suspek nga si Nilo, 52, minyo, taga Brgy. Prenza sa mao nga lungsod.

Si Nilo nasikop pagka ala 1:10 sa kaadlawon sa Lunes, Disyembre 5 atol sa hot pursuit operation.

Si Police Lt. Col. Glenn Hife, hepe sa Balamban Police Station nga nahinabi sa Superbalita Cebu, nagkanayon nga si Lito diha sa gawas sa iyang balay uban sa asawa ni Nilo nga si Rose, 42.

Sa kalagot ni Nilo, iyang gikomprontase si Lito nga nisangko sa panaglalis ug sinumbagay.

Nakaibot si Nilo sa iyang gidala nga sundang ug gitigbas si Lito sa makadaghan.

Bisan samaran sa ulo ug bukton, nakadagan pa si Lito ug daling gidala sa mga kabanay sa publikong tambalanan.

Ang suspek nadakpan sa hot pursuit operation ug narekuber ang 12-inch nga sundang.

Si Hife nagkanayon nga napuno na ang suspek sa biktima gumikan kay kanunay na niyang masakpan ang iyang asawa nga kuyog si Lito.

Niadtong higayuna nawala ang iyang asawa sa ilang balay.

Giadto niya ang panimalay sa biktima kay nagduda siya nga naa ang iyang asawa.

“Lagot na siya kay kanunay niyang masakpan ang iyang asawa nga sabak-sabak sa biktima. Sa kalagot giataki niya ang biktima,” dugang ni Hife.

Sumala ni Hife nga gibuhian nila ang suspek sa Martes sa udto human ang biktima dili na mopasaka og kaso.

Ang biktima niangkon sa iyang mga kasaypanan sa interbyu sa Superbalita Cebu.

‘RELASYON’

Si Lito nga nahinabi sa Superbalita Cebu nipadayag nga dili na siya interesadong mopasakag kaso bisan pa sa kadako sa iyang samad sa ulo ug walang bukton.

Naluoy siya kang Rose nga maapil sa pagkapriso, matud sa biktima, kay nihulga usab si Nilo nga mopasaka og kaso batok kanilang duha.

Gawas niini, nihangyo sab si Rose kay naluoy siya sa iyang duha ka mga anak nga ulitawo ug dalaga kon mapriso ang iyang bana.

Gitug-an ni Lito nga duha ka tuig na ang ilang relasyon ni Rose, kinsa nihulagway sa iyang bana nga “hingulata.”

Dugang niya nga makadaghan nang higayon nga sila nasakpan sa suspek.

Kanunay na moapas ang suspek kang Rose sa iyang balay.

“Naa man gyud nang loving namo, mosulong si Rose unya naa sab nang sabak-sabak ba,” angkon sa biktima.

Ang suspek nibahad kaniya nga dunay dautang mahitabo. Mao nga dihang naabot sa ilang balay gisumbag dayon niya samtang si Nilo nagsige og tigbas kaniya.

“Dihang nakita nako nga namilegro akong kinabuhi, nagdali ko pagdagan,” asoy ni Lito.