Koreano mibawos pagbahad

    ■ BOL-ANON 8: Gigunitan ni PMI Bohol Boxing Promotions head Floriezyl Echavez Podot (tunga) ang WBO Oriental super feartheweight belt nga ilugan nila ni Filipino John Virgel “Valiente” Vitor (tuo) ug Korean Dong Kwan Lee (wala) karong gabii, Disyembre 8, 2022, sa main event sa “Kumong Bol-anon 8” boxing promotion sa Calape, Bohol. /Erwin S. Lirazan
■ BOL-ANON 8: Gigunitan ni PMI Bohol Boxing Promotions head Floriezyl Echavez Podot (tunga) ang WBO Oriental super feartheweight belt nga ilugan nila ni Filipino John Virgel “Valiente” Vitor (tuo) ug Korean Dong Kwan Lee (wala) karong gabii, Disyembre 8, 2022, sa main event sa “Kumong Bol-anon 8” boxing promotion sa Calape, Bohol. /Erwin S. Lirazan

TAGBILARAN CITY, BOHOL -- Nibawos pagbahad si Korean Dong Kwan Lee ngadto sa garbo sa Bohol nga si World Boxing Organization (WBO) Oriental super featherweight champion John Virgel “Valiente” Vitor kabahin sa ilang engkuwentro karong gabii, Disyembre 8, 2022, sa main event sa “Kumong Bol-anon 8” boxing promotion sa Calape Coliseum sa Calape, Bohol.

Sa press conference kagahapon sa Tagbilaran City Hall, gipangutana si Lee kon unsay iyang ikasulti kabahin sa bahad ni Vitor nga pakamangon siya niini sulod sa lima ka rounds.

“I think he can’t hit me. What he said will be reversed,” matod ni Lee, kinsa maoy labing unang mosuway pag-ilog sa titulo ni Vitor.

Gitubag kini ni Vitor pinaagi sa pag-ingon nga iyang palabwan kon unsay ipakitang away ni Lee.

“Excited kaayo ko kay first ni nako nga depensa. Kon unsay iyang ipakita nga away akong palabwan,” matod ni Vitor, kinsa usa ka sumosulbong nga boksidor sa PMI Bohol Boxing Promotions

Gipaneguro ni Vitor nga ang iyang bahad maoy matuman.

“Posible gyud naay mahitabong knockout kay mao gyud ni ang akong gi-aim nga impressive ang akong away. Basta dili lang gyud ko mokompiyansa,” dugang ni Vitor.

Si Vitor, kinsa lumad nga taga Tagbilaran City, Bohol, naggunit og 19-2, 12KOs nga rekord samtang si Lee naggunit og 16-2-2, 7KOs nga baraha.

Ang promoter sa away nga si PMI Bohol Boxing Promotions head Floriezyl Echavez Podot nihatag og kaseguroan nga matagbaw ang mga tumatan-aw ning maong promosyon.

“Among gisegurado that all the fights are exciting. Gipili gyud namo ang fighters para nindot ang mga away kay mao ni ang trademark sa PMI boxing,” batbat ni Podot.

Sa top supporting bout, magsumbagay sila si Daniel Nicolas sa PMI Colleges Bohol ug Jestine Tesoro sa Davao del Sur alang sa WBO Oriental Youth featherweight title.

Adunay upat ka mga boksidor sa Sugbo nga moaway sa undercard sa promosyon.

Kini mao sila si Christian Balunan sa Consolacion, Reymart Tagacano sa Carcar City, Rhay Siose sa Mandaue City ug Ryan Maano sa Tuburan.

Si Balunan makigharong ni Jay-R Tulinan sa Bukidnon, si Tagacano makigbatok ni Jerry Tabago sa Koronadal, si Siose makig-away ni Dave Perlas sa South Cotabato samtang si Maano makigharong ni Arnel Tinampay sa Ubay, Bohol.

Magbinukbokay sab sila si Jhunriel Castino sa PMI batok Emmanuel Mogawa sa Dipolog City, Shane Gentallan sa PMI batok Ronald Ewican sa Tangub City, John Pangga sa Cagayan de Oro City batok Ruel Julian sa Bukidnon, Rodel Suganob sa PMI batok Mark Antaran sa Davao City, Gerwin Asilo sa PMI batok Kier Espere sa Surigao City, Pablito Balidio sa PMI batok Ernesto Camiguing sa Agusan del Sur.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph