Gilauman ang makapaukyab nga mga kombati sulod sa rectangle nga korte ang masaksihan sa pagsugod sa semi-final round sa college division sa Cebu Schools Athletic Foundation Inc. (CESAFI) basketball karong adlawa, Disyembre 8, 2022, sa Cebu Coliseum.
Ang No. 1 team University of the Visayas (UV) Green Lancers makigsangka sa No. 4 University of San Jose Recoletos (USJ-R) Jaguars sa premirong duwa karong alas 5:15 sa hapon.
Sa main game, magpinaksitay ang No. 2 University of Southern Philippines Foundation (USPF) Panthers ug No. 3 University of Cebu (UC) Webmasters.
Isip benepisyo sa ilang pagsulod sa top two, ang Green Lancers ug Panthers naggunit og twice-to-beat nga bintaha ning mga sangkaa.
Sa laing bahin, magparang sa finals series sa high school division ang City of Bogo Science and Arts Academy (CBSAA) Trail Blazers ug Sacred Heart School-Ateneo de Cebu (SHS-AdC) Magis Eagles human nila gipangdispatsar og sayo ang ilang tagsatagsa ka kontra sa semi-finals niadtong Disyembre 6, 2022.
Ang Trail Blazers ningpalagpot sa UV Baby Green Lancers, 67-63, aron inaton ang ilang perpektong rekord ngadto sa 10 gikan pa sa elimination round.
Samtang ang Magis Eagles, nga maoy defending champions, ningtaktak sa UC Baby Webmasters, 83-78.