KINATIBUK-ANG 105 ka kanhi rebelde diskuwalipikado ug wala makapahimulos sa Enhanced Comprehensive Local Integration Program (E-Clip), tug-an sa 10th Infantry Division (ID).
Gikanayon ni 10th ID Spokesperson Captain Mark Anthony Tito atol sa AFP-PNP Press Conference sa Royal Mandaya Hotel Miyerkules, Disyembre 7, 2022, ang mga diskuwalipikado nga kanhi rebelde nahibawo na kung nganong wala sila makonsidera nga makapahimulos sa programa.
"Aminado ni sila nga dili sila kapasar because we found out nga dili gyud sila legitimate members sa CTG (communist terrorist group)," pagtin-aw ni Tito.
Dugang pa niya nga ang 105 ka kanhi rebelde kinsa gikan sa area of responsibility sa 10th ID mga miyembro sa underground mass organization (Ugmo).
Matud sa opisyal nga aron maseguro nga kadtong bag-o lang nagsurender nga mga kanhi rebelde makarga sa sa programa, ang 10th ID nagmugna og Joint AFP-PNP Intelligence Committee (Japic).
Apan bisan sa pagkadiskuwalipika, mga kanhi rebelde nakadawat gihapon og livelihood ug cash assistance gikan sa gobyerno kay gikonsidera sila isip kabahin sa peoples organization (PO).
"Mahatagan ni sila'g panginabuhian para didto sa ilahang respective communities. Mao ni atong ginatutukan ron para tanang POs nato mahimong sustainable," pasalig niya.
Human mapatuman ang E-Clip sa Davao Region gikan 2016 hangtud 2022, sa 2,226 ka kinatibuk-ang kanhi mga rebelde, mga 1,488 pulos mga regular members sa CTGs, samtang 738 sa milisyang bayan (MB) members. Ang 1,213 ka miyembro nakadawat og P15,000 nga tabang pinansiyal, 1,002 nakadawat og tabang panginabuhian kantidad og P50,000.
Mga kanhi rebelde nakadawat sab og insentibo gikan sa mga gitahan nga mga armas. Kinatibuk-ang 724 ka pusil ang gitahong gisurender.