GISUBAY na karon sa mga awtoridad sa Cotabato City Police Office (CCPO) ang nagpaluyo sa pagpamulabog sa Christmas lightning ceremony sa Cotabato City alas 6:20 sa gabii niadtong Martes, Disyembre 6, 2022.
Sobrang kahadlok ang gibati sa katawhan atol sa pagpasiga sa mga Christmas lights sa dakbayan gumikan sa sunod-sunod nga buto sa mga armas.
Gibutyag ni CCPO Director Colonel Querubin Manalang nga pipila na lang ka gutlo alang sa "countdown", dungan sa pagpasiga sa mga christmas lights sa City Plaza dihang kalit lang nga dunay nagpaarak og mga bala sa armas.
Daling nanagan ang mga nitambong sa maong programa, kasagaran mga bata nga misalmot sa kontes.
Dali sab nga gi-secure si Cotabato City Mayor Datu Mohammad "Bruce" Matabalao, city councilors, deputy mayors ug pipila ka iladong mga bisita sa ilang mga security escorts ug gidala sa luwas nga dapit.
Abtik nga nagresponde ang mga pulis, mga sundalo ug ginsakpan sa Special Weapons and Tactics (Swat) Team apan nakaikyas na ang mga nagpabuto sa armas.
Maayo na lang kay way naigo sa pagpaarak apan sobrang kahadlok ang gibati sa mga mitambong sa opening of lights sa siyudad.
Nanawagan si Mayor Matabalao nga kung kinsa man kadtong "kasama sa mga nanood sa lighting activity sa City Plaza lalo na sa mga bata, matanda, at babae na nasaktan dahil sa nangyaring gulo dulot ng putok ng baril, mangyari pong ipagbigay-alam agad sa aking opisina. Sama-sama tayong patuloy na magdasal para sa katiwasayan ng mahal nating lungsod".