Mohimo si Cebu Archbishop Jose Palma sa iyang unang Misa de Gallo sa Nuestra Señora del Pilar Church sa Sibonga, Sugbo karong Disyembre 16, 2022, diin gipaabot nga dili mominos 6,000 ka mga deboto ang motambong.

Si Palma nipahibawo nga iyang i-concelebrate ang unang misa sa Pasko sa kaadlawon sa Sibonga tungod kay ang habagatang lungsod maoy usa sa mga lugar nga grabeng naigo sa super typhoon Odette, nga niguba sa habagatang bahin sa lalawigan sa Sugbo niadtong Disyembre 16, 2021.

Sunod ni Palma mao ang mga lungsod sa Argao ug Badian.

Mobalik siya sa dakbayan sa Sugbo sa Barangay Talamban ug Barangay Guadalupe, Barangay Casuntingan sa dakbayan sa Mandaue, Cebu Catholic Television Network, Metropolitan Cathedral ug Carbon Public Market nga mokompleto sa iyang mga Misa de Gallo.

Ang hepe sa Sibonga Police Station nga si Major Rodgene Fodutan niingon nga andam sila sa pagsiguro sa simbahan alang sa maong aktibidad.

Matod niya 14 ka mga pulis gikan sa Sibonga Police Station ug 30 ngadto sa 40 ka force multipliers ang ibutang sulod ug gawas sa simbahan.

Matud niya nga mahimong mosaka ang gidaghanon kon makakuha sila og dugang manpower gikan sa provincial headquarters.

Si Fodutan niingon nga magbutang sila og mga assistance desk sa mga estratehikong dapit sulod sa compound sa simbahan aron matubag ang mga kabalaka sa publiko.

Sa laing bahin, ang hepe sa kapulisan nag-awhag sa publiko sa pag-obserbar sa minimum health protocols isip proteksyon batok sa coronavirus disease. /