Moabot sa 13 ka mga ahensya sa gobiyerno ug non-government groups ang ninglagda og kasabutan tali sa Kagamhanan sa Lalawigan sa Sugbo alang sa pakigbatok sa illegal nga drugas, kriminalidad ug terorismo sa tibuok Sugbo.
Naglakip kini sa Philippine National Police (PNP), Philippine Drug Enforcement Agency (PDEA), National Bureau of Investigation (NBI), Armed Forces of the Philippines (AFP) Visayas Command, National Intelligence Coordination Agency (NICA-7), Mactan Cebu International Airport Authority (MCIAA), Philippine Coast Guard (PCG) Visayas, Cebu Port Authority (CPA), Maritime Industry Authority (MARINA-7), Bureau of Customs (BOC), Civil Aviation Authority of the Philippines (CAAP), Bureau of Immigration (BI-Cebu) ug Integrated Bar of the Philippines (IBP) Cebu City ug Cebu Province.
Kining tanan gipaubos sa One Cebu Interdiction Inter-Agency Task Force nga maoy moabag sa mga operasyon ug lagda aron mokunhod ug masumpo ang illegal nga drugas ug uban pang mga kontrabando sa Sugbo.
Segunda kini sa pagdeklarar ni Cebu Governor Gwendolyn Garcia sa “all-out war” batok sa illegal nga drugas sa Sugbo.
Dunay grupo nga motutok sa airport, seaports ug may support service nga motuki sa legal nga bahin sa mga kaso batok sa mga madakpan.
Ang mangulo o overseer sa task group mao si Garcia, kauban sila si Regional Directors Levi Ortiz sa PDEA isip Task Force Commander, PBGen. Roderick Agustus Alba isip deputy Task Force Commander, MCIAA General Manager Julius Neri Jr. isip pangulo sa Task Group Airport ug CPA General Manager Glenn Castilla isip pangulo sa Task Group port ug seaport. /